Apple-ը խելացի մատանի է արտոնագրել

Apple-ը նոր խելացի մատանի է արտոնագրել։ Գյուտի արտոնագիրը գտել են Միացյալ Նահանգների արտոնագրերի և ապրանքանիշների գրասենյակի (USPTO) տվյալների բազայում, այս մասին տեղեկացնում է 9to5Mac կայքը։

Արտոնագրի նկարագրությունում ասվում է, որ կրելի սարքը կաշխատի մեկուսացված ռեժիմով և տվյալներ կհավաքի օգտատիրոջ գործունեության և առողջության մասին։ «Հավաքված տվյալները կարող են փոխանցվել այլ սարքերի»,- նշում են կորպորացիայի ինժեներները:

Ընդորում, մի շարք սցենարներում խելացի մատանին հնարավոր կլինի համադրել այլ սարքերի հետ։ Օրինակ՝ այն կարող է օգտագործվել ընդլայնված իրականության սարքի հետ՝ կառավարելու, տեքստի ավելի ճշգրիտ մուտքագրման և սարքի կարգավորումների համար: Ներկայումս Apple ապրանքանիշի ներքո թողարկվել է խառը իրականության միայն մեկ սարք՝ Vision Pro-ն։

Ըստ լրատվամիջոցների՝ նկարագրված կառավարման համակարգը կարող է բարելավել Apple-ի կողմից հայտնագործված AR և VR սարքերի ճշգրտությունը։ Այնուամենայնիվ, նրանք նշել են, որ ընկերությունը կարող է չսկսել խելացի մատանու մշակման աշխատանքները, քանի որ մինչև նման անհրաժեշտություն առաջանա, գյուտը հնացած կլինի։

Փետրվարին Bloomberg-ը պարզել էր, որ Apple-ն առաջիկա տարիներին կներկայացնի մի քանի նոր կրելի սարքեր: Դրանք ներառում էին ներկառուցված տեսախցիկներով ականջակալ և խելացի մատանի։