Գիտնականները հսկա անակոնդայի նոր տեսակ են հայտնաբերել

Գիտնականների թիմը, որն աշխատում է National Geographic-ի նկարահանող խմբի հետ հեռավոր Ամազոնում, հայտնաբերել է հսկա անակոնդայի նախկինում չփաստաթղթավորված տեսակ, հայտնում է Naked-science-ը։

Համաձայն MDPI Diversity ամսագրում հրապարակված հետազոտության, կանաչ անակոնդա Eunectes murinus-ն իրականում երկու գենետիկորեն տարբեր տեսակ է: Սա այն դեպքում, երբ յուրաքանչյուր տեսակ արտաքինից այնքան նման է, որ նույնիսկ փորձագետները չեն կարողանում տարբերել դրանք:

Հայտնաբերված արարածների չափերը տպավորիչ էին. մեկ էգի երկարությունը հասնում էր 6,3 մետրի: Իսկ Վաորանիների ոչ պաշտոնական տվյալների համաձայն՝ նրանք այդ տարածքում նկատել են ավելի քան 7,5 մետր երկարությամբ և մոտ 500 կիլոգրամ քաշով անակոնդաներ։ Ենթադրվում է նույնիսկ, որ ամենամեծ անակոնդաներն ունակ են մարդ սպանել և ուտել: Այնուամենայնիվ, նման դեպքերը հավաստիորեն արձանագրվել են միայն Ասիայում՝ օձերի հետ, որոնք հայտնի են որպես ցանցավոր պիթոններ:

Գիտնականներին հաջողվել է բռնել ու ուսումնասիրել հայտնաբերված օձերին։ Նրանց գործընկերները նաև արյան և հյուսվածքների նմուշներ են հավաքել կանաչ անակոնդաներից Էկվադորում, Վենեսուելայում և Բրազիլիայում: Գենետիկական տվյալները վերլուծելուց հետո հետազոտողները պարզ տարբերություն են գտել իրենց արեալի հյուսիսային մասում նմուշառված անակոնդաների և հարավում ապրողների միջև: Հյուսիսային կանաչ անակոնդա տեսակները շեղվել են հարավային կանաչ անակոնդայից մոտ 10 միլիոն տարի առաջ և գենետիկորեն տարբերվում են 5,5 տոկոսով (համեմատության համար՝ մարդու գենոմը շիմպանզեի գենոմից տարբերվում է ընդամենը մոտ երկու տոկոսով):

Հիմնվելով նոր տվյալների վրա՝ հետազոտության հեղինակներն առաջարկել են վերանվանել հյուսիսային կանաչ անակոնդա օձերին Eunectes akayima, մինչդեռ E. murinus-ը կշարունակի մնալ հարավային կանաչ անակոնդա: