Թուրքիան հայտարարել է սեփական արտադրության առաջին ռադարի շահագործման մեկնարկի մասին

Թուրքիայում ստեղծված սեփական արտադրության ռադարը թույլ կտա հանրապետության ողջ օդային տարածքի շուրջօրյա հսկողություն իրականացնել։ Այս մասին հայտարարել է երկրի տրանսպորտի նախարարության ղեկավար Աբդյուլքադիր Ուրալօղլուն։

«Ղազիանթեփի օդանավակայանում տեղադրվել է թուրք ինժեներների ստեղծած առաջին հայրենական հսկողության ռադարը (MGR): Ռադարային համակարգի շնորհիվ, որը նախատեսվում է տեղադրել տարբեր տարածքներում, կապահովվի Թուրքիայի ողջ օդային տարածքի շուրջօրյա հսկողությունը 1 միլիոն քառակուսի կմ տարածքի վրա։ Օդային շարժման անվտանգության եվրոպական կազմակերպության (Eurocontrol) առաջարկությունների համաձայն ստեղծված MGR ռադարը համապատասխանում է Քաղաքացիական ավիացիայի միջազգային կազմակերպության (ICAO) բոլոր չափանիշներին»,- գրել է նախարարը X-ում (նախկինում՝ Twitter):

Նա նշել է, որ Թուրքիայի կողմից քաղաքացիական ավիացիայի կարիքների համար սեփական ռադարի ստեղծումը կօգնի բարելավել օդային հաղորդակցման անվտանգության վերահսկումը, նվազեցնել արտաքին կախվածությունը և կնպաստի ավիացիոն ոլորտում երկրի տեխնոլոգիական զարգացմանը։