Արդյո՞ք կատուների ու շների մոտ մարդկանց նկատմամբ ալերգիա լինում է

Ալերգիան տարածված է մարդկանց մոտ և կարող է ուղեկցել կենդանիների հետ շփմանը՝ առաջացնելով ախտանիշներ, ինչպիսիք են աչքերի քորը և փռշտոցը:

Բայց կարո՞ղ են շներն ու կատուները մեր նկատմամբ ալերգիկ լինել:

Ըստ Կորնելի համալսարանի անասնաբուժական բժշկության քոլեջի մաշկաբանության կլինիկական պրոֆեսոր, դոկտոր Հիզեր Էդգինթոնի՝ մեր մորթե ընկերները կարող են ալերգիկ ռեակցիաներ ունենալ մարդկանց նկատմամբ:

«Ալերգիայի երեք հիմնական կատեգորիաները, որոնք մենք տեսնում ենք շների և կատուների մոտ լուների ալերգիաներն են, սննդային ալերգիաները և շրջակա միջավայրի ալերգիաները», - ասաց Էդգինթոնը Live Science-ին,- «Մարդկանց նկատմամբ ալերգիաները պատկանում են էկոլոգիական ալերգիաների կատեգորիային»:

Բարեբախտաբար, ընտանի կենդանիների մոտ ալերգիայի ախտանիշները սովորաբար մեղմ են: Միայն շատ հազվադեպ են ախտանիշները վտանգավոր կամ կյանքին սպառնացող:

Սովորաբար, երբ շունը կամ կատուն ալերգիկ է մարդկանց նկատմամբ, նրա արձագանքը նման է շների կամ կատուների նկատմամբ ալերգիկ մարդու ռեակցիային: Սովորաբար, ալերգիկ ռեակցիա ունեցող շունը կամ կատուն բազմիցս քերծում են այլապես առողջ տեսք ունեցող մաշկը: Այս վիճակը կոչվում է ատոպիկ դերմատիտ, որն ավելի հաճախ հայտնի է որպես էկզեմա: Կատուների և շների մոտ էկզեմայի պատճառ կարող է լինել մարդու թեփը, որը ներառում է մաշկի մահացած բջիջները և մազերը:

Շների մոտավորապես 20%-ից, որոնք ունեն ալերգիայի ախտանիշներ, մոտ կեսը ալերգիկ է մարդու մազերից: Եվ չնայած ատոպիկ դերմատիտը տարածված է կատուների մեջ, քիչ է հայտնի այն, թե որքան հաճախ է այն առաջանում մարդկանց հետ շփման արդյունքում:

Մարդկային ալերգիա ունեցող շան ձագերի համար կան բուժման մի քանի տարբերակներ, ինչպիսիք են պրոֆիլակտիկ հակահիստամինները, ասաց Էդգինթոնը: Սա հաճախ տրվում է հաբերի տեսքով և նշանակում է, որ կենդանուն անհրաժեշտ են դեղամիջոցի ամենօրյա չափաբաժիններ՝ ախտանիշները վերահսկելու համար:

Սակայն ոչ բոլոր ընտանի կենդանիներն են արձագանքում դեղամիջոցին: