Կարելի՞ է արդյոք սմարթֆոնը լիցքավորել գիշերը

Սմարթֆոնը կարելի է գիշերը դնել լիցքավորման՝ առանց հսկողության․ դրա պատճառով մարտկոցը չպետք է բռնկվի, կարծում է PCMag-ի հեղինակներից Էրիկ Գրիֆիթը։

Նրա խոսքով՝ պնդումը, թե գիշերը լիցքավորման պատճառով մարտկոցը գերծանրաբեռնվում է, պարզապես միֆ է։ Ճիշտ է, հեռախոսն ամբողջ գիշեր լիցքավորման թողնելը կնվազեցնի մարտկոցի կյանքը, բայց դա չի հանգեցնի հրդեհավտանգ իրավիճակի։

«Հեռախոսները բավական խելացի են, որպեսզի թույլ տան ծանրաբեռնում: Ներսում անվտանգության լրացուցիչ չիպերն ապահովում են, որ դա տեղի չունենա պլանշետի, հեռախոսի կամ նույնիսկ նոութբուքի հետ»,- ասել է մասնագետը։

Նրա խոսքով՝ սմարթֆոնը կարելի է գիշերը թողնել մահճակալի մոտ, սակայն սարքի վրա որևէ բան դնել խորհուրդ չի տրվում։ Բացի դրանից, հեռախոսը չի կարելի դնել բարձի տակ։

«Եթե խախտեք այս պահանջները, ապա սմարթֆոնը կտաքանա, ոչ թե այնքան, որ ինքնաբուխ բռնկվի, այլ այնքան, որ մարտկոցը կվնասվի», - ասել է Գրիֆիթը:

Մարտկոցի հետ կապված խնդիրներից խուսափելու համար սմարթֆոնը սառնարանում պահելու անհրաժեշտությունը, ըստ Գրիֆիթի, նույնպես հիմար միֆ է։

«Լիթիում-իոնային մարտկոցները ատում են երկու բան՝ ծայրահեղ ցուրտ և ծայրահեղ շոգ: Զրոյից ցածր ջերմաստիճանում հեռախոսը բազմիցս լիցքավորելը չի ​​լուծի խնդիրը: Դա պարզապես ավելի արագ կսպանի մարտկոցը»,- նշել է նա:

Գրիֆիթի խոսքով՝ եթե սմարթֆոնի մարտկոցը տաքացել է, ապա պետք է սարքը դնել ստվերում, որտեղ այն արևի ուղիղ ճառագայթների տակ չէ, և որոշ ժամանակ չօգտագործել սարքը։

Նշենք, սակայն, որ վերջին շրջանում սմարթֆոնների պայթյունների դեպքերը բավականին հաճախ են գրանցվել։

Այսպես, վերջերս Reddit-ի օգտատերերից մեկը՝ itsmeshailesh մականունով, տեսանյութ էր հրապարակել ծխացող OnePlus 8 Pro սմարթֆոնով. ըստ նրա՝ սմարթֆոնը պայթել էր սպասման ռեժիմում գտնվելիս, այսինքն՝ այն այդ ժամանակ ո՛չ օգտագործվելիս է եղել, ո՛չ էլ լիցքավորվելիս:

Այս տարվա հունվարին ԱՄՆ Օհայո նահանգի տներից մեկում լիցքավորվող iPhone 4-ը բռնկվել էր, երբ ամբողջ ընտանիքը քնած էր եղել։ Խոհանոցում տեղադրված տեսախցիկը ֆիքսել էր, թե ինչպես է հրդեհը մարվել բռնկվելուց անմիջապես հետո։ Բարեբախտաբար, ոչ ոք չէր տուժել։

Իսկ Հնդկաստանում Redmi Note 5 Pro սմարթֆոնի պայթյունի հետևանքով 8-ամյա աղջիկ էր մահացել։