WhatsApp-ում նոր գործառույթ է հայտնվել, որն ընդօրինակել են Telegram-ից

WhatsApp-ի Android և iOS հավելվածների բետա տարբերակներում նոր գործառույթ է ավելացել, որը հնարավորություն է տալիս 60 վայրկյան տևողությամբ տեսահաղորդագրություններ ձայնագրել և ուղարկել, ինչպես Telegram մեսենջերում:

Ինչպես հայտնում է WABetaInfo պորտալը, նոր գործառույթը հայտնվել է iOS-ի համար՝ 23.12.0.71, իսկ Android-ի համար՝ 2.23.13.4 համարով տարբերակներում։ Նորույթն աշխատում է այնպես, ինչպես Telegram-ում. չատում գտնվող խոսափողի կոճակը սեղմելիս ռեժիմը ձայնային հաղորդագրություն ձայնագրելուց վերածվում է տեսահաղորդագրության ձայնագրման ռեժիմի:

Տեսահաղորդագրությունը դիտելու համար անհրաժեշտ է մեծացնել այն՝ սեղմելով տեսանյութի վրա։ Բայց ստացողը ևս պետք է ունենա WhatsApp-ի այս տարբերակը, որն աջակցում է տվյալ գործառույթը։

Տեսահաղորդագրությունները, ըստ պարբերականի, կոդավորված են, և ստացողը չի կարող այն փոխանցել այլ օգտատերերի։ Այնուամենայնիվ, սարքի էկրանը տեսաձայնագրելուց պաշտպանելու հնարավորությունը մեսենջերը չի ապահովում:

Դեռ հայտնի չէ, թե երբ նորամուծությունը կհայտնվի WhatsApp-ի կայուն տարբերակներում։

WhatsApp-ը վերջերս ներկայացրել է նոր գործառույթ՝ Channels-ը, որը պարզ, հուսալի և կոնֆիդենցիալ միջոց է առանց հավելվածից դուրս գալու մարդկանց և կազմակերպությունների մասին կարևոր նորություններին հետևելու համար:

Վերջերս նաև հնարավոր է դարձել մեսենջերում լուսանկարներ ուղարկել HD որակով, ստեղծել մականուններ ինքներդ ձեզ համար, ինչը կօգնի պարզեցնել առանց հեռախոսահամարի կոնտակտի որոնումը, պաշտպանել անձնական նամակագրությունը գաղտնաբառով կամ կենսաչափական տվյալներով և շատ այլ գործառույթներ:

Մեկ այլ երկար սպասված գործառույթ, որը վերջերս է հայտնվել, արդեն ուղարկված հաղորդագրությունները խմբագրելու հնարավորությունն է: Այնուամենայնիվ, դա կարելի է անել հաղորդագրությունն ուղարկելուց հետո 15 րոպեի ընթացքում: