Արհեստական բանականության կնքահայրը հեռացել է Google-ից. ի՞նչ ռիսկեր է նա տեսնում ԱԲ զարգացման մեջ

Մոտ հիսուն տարի Ջեֆրի Հինթոնը մշակել է այն տեխնոլոգիան, որն այնուհետև հիմք է դարձել այնպիսի չատբոտերի ստեղծման համար, ինչպիսին է ChatGPT-ն: Նա վերջերս լքել է Google-ը, որտեղ ավելի քան 10 տարի անցկացրել է մեքենայական ուսուցման ալգորիթմների մշակման վրա: Այժմ նա մտավախություն ունի, որ այս տեխնոլոգիան կարող է լուրջ վնաս հասցնել։

Ինչպես տեղեկացնում է NY Times-ը, Հինթոնը համարվում է ԱԲ ոլորտի առաջամարտիկն ու կնքահայրը. 2012-ին Տորոնտոյի համալսարանի իր ասպիրանտների հետ միասին նրանք ստեղծել են այն տեխնոլոգիան, որը հիմք դարձավ այսօր մեզ հայտնի ԱԲ-ի համար: Խոսքը նեյրոնային ցանցի մասին է, որը կարող էր վերլուծել հազարավոր լուսանկարներ և բացահայտել դրանց վրա գտնվող այնպիսի առարկաներ, ինչպիսիք են ծաղիկները, շները և մեքենաները: Google-ը, ըստ հրապարակումներ, 44 միլիոն դոլար է տվել Հինթոնի հիմնադրած ընկերությունը ձեռք բերելու համար:

Այժմ Հինթոնը կարծում է, որ ԱԲ զարգացմամբ զբաղվող ընկերությունները շատ վտանգավոր բան են անում։ Ինքը մասամբ զղջում է իր կյանքի աշխատանքի համար։ Ճիշտ է, նա ինքն իրեն մխիթարում է նրանով, որ եթե ինքը չաներ դա, ապա դա կաներ մեկ ուրիշը։

Այսօր շատ մասնագետներ մտավախություն ունեն, որ ԱԲ տեխնոլոգիաները կարող են կեղծ տեղեկություններ տարածելու գործիք դառնալ, ավելին` սպառնալ առկա աշխատատեղերին։ Նրանց մտահոգությունները, կարծես, կիսում է նաև Հինթոնը:

«Դժվար է պատկերացնել, թե ինչպես կարելի է կանխել տեխնոլոգիայի օգտագործումը չարամիտ օգտատերերի կողմից վատ նպատակներով»,- ասել է Հինթոնը:

Նրա կարծիքով՝ որքան ԱԲ համակարգերը կատարելագործվում են, այդքան դրանք ավելի ու ավելի վտանգավոր են դառնում։

«Տեսեք, թե ինչ կար հինգ տարի առաջ, և ինչ կա հիմա... համեմատեք տարբերությունը և պրոյեկտեք այն ապագայի վրա: Սարսափելի է»,- ասել է փորձագետը։