Ո՞վ և ե՞րբ է արել աշխարհում առաջին բջջային հեռախոսազանգը

Ուղիղ 50 տարի առաջ այս օրը՝ 1973 թ․ ապրիլի 3-ին, աշխարհում առաջին անգամ հեռախոսազանգ է կատարվել բջջային հեռախոսով։ Այս մասին հայտնում է BBC-ն։

Առաջին հեռախոսազանգն արել է Motorola ընկերության ինժեներ Մարտին Կուպերը, որին նաև անվանում են «բջջային հեռախոսի հայր»։ Նա զանգահարել է մրցակից AT&T Bell Laboratories ընկերության աշխատակից Ջոել Էնջելին, որպեսզի նրան տեղեկացնի, որ օգտագործում է «անձնական, ձեռքում տեղավորվող, շարժական հեռախոս»:

«Եվ ես ասացի՝ Ջոել, սա Մարտին Կուպերն է... Ես քեզ հետ խոսում եմ ձեռքի բջջային հեռախոսով։ Բայց իսկական բջջային հեռախոս՝ անձնական, շարժական, ձեռքի։ Գծի մյուս ծայրում լռություն էր։ Կարծում եմ՝ նա ատամներն էր կրճտացնում»,- պատմել է Կուպերը։

Սարքը, որից զանգել էր Կուպերը, Motorola DynaTAC հեռախոսն էր, որը կշռում էր գրեթե 800 գրամ և ուներ 33 սմ երկարություն։ Հեռախոսն ամբողջությամբ լիցքավորելու համար պահանջվում էր 10 ժամ։

«Այդ հեռախոսը մոտ մեկ կիլոգրամ էր կշռում ․․․ իսկ խոսելու ռեժիմում մարտկոցն աշխատում էր մոտ 25 րոպե։ Դա խնդիր չէր: Այդ հեռախոսը այնքան ծանր էր, որ չէիր էլ կարող պահել այն 25 րոպե»,- ասել է Կուպերը։

Այդ ժամանակ SMS հաղորդագրությունների մասին դեռ խոսք չկար՝ հեռախոսը կարող էր միայն զանգեր կատարել և զանգեր ստանալ:

Մարտին Կուպերի կիրառած հեռախոսի կոմերցիոն տարբերակը՝ Motorola Dynatac 8000X-ը, թողարկվել է 1983 թ․ պատմական զանգից 10 տարի անց։ Motorola Dynatac 8000X-ն այդ ժամանակ ԱՄՆ-ում վաճառվում էր 3995 դոլարով։