Հին պլաստիկ խաղալիքների ավելի քան 80 տոկոսը կարող են դանդաղեցնել երեխաների աճը եւ քաղցկեղ առաջացնել. հետազոտություն

Պլաստիկ խաղալիքները, ինչպիսիք են արձանիկները, տիկնիկները եւ Լեգոն, վտանգ են ներկայացնում երեխաների առողջության համար, նախազգուշացնում են մասնագետները:

Հետազոտությունը ցույց է տվել, որ դրանց մեծ մասը թունավոր քիմիական նյութերի վտանգավոր մակարդակ է պարունակում, որոնք կարող են դանդաղեցնել երեխայի աճը եւ կապված են քաղցկեղի եւ անպտղության հետ:

Շվեդիայից գիտնականներն ուսումնասիրել են երկու վնասակար թունավոր նյութերի մակարդակն ավելի քան 150 հին եւ նոր խաղալիքներում: Թեեւ տասը նոր խաղալիքներից մոտ երեքը գերազանցել են ԵՄ-ում եւ Մեծ Բրիտանիայում սահմանված նորմերը, հին խաղալիքների ավելի քան 80 տոկոսը չեն համապատասխանել պահանջներին:

Որոշ հին խաղալիքների մեջ «հավերժական քիմիկատների» կոնցենտրացիան, որոնց քայքայման համար կարող են տարիներ պահանջվել, գերազանցել է սահմանված նորմերը 400 անգամ։

Գյոթեբորգի համալսարանի մասնագետները փորձարկել են 157 տարբեր խաղալիքներ, այդ թվում՝ գնդակներ, տիկնիկներ, արձանիկներ եւ հագուստի իրեր, ֆտալատների կամ քլորացված պարաֆինների առկայության համար:

Առաջինները քիմիական նյութերի խումբ են, որոնք օգտագործվում են պլաստմասսաներն ավելի ամուր դարձնելու համար, որոնք հաճախ պլաստիկացնողներ են կոչվում: Վերջիններս օգտագործվում են խաղալիքները ոչ դյուրավառ դարձնելու համար եւ թունավոր են համարվում մարդկանց համար:
Ֆտալատները կապված են ասթմայի, կրծքագեղձի քաղցկեղի, գիրության, շաքարախտի, ցածր IQ-ի, զարգացման եւ պտղաբերության խնդիրների հետ:

Համարվում է, որ այս կոշտ քիմիական նյութերը, հայտնվելով օրգանիզմում, խանգարում են մեր ներքին համակարգերին եւ վնասում ԴՆԹ-ն, ինչը կարող է քաղցկեղի հանգեցնել: ԵՄ-ի եւ Մեծ Բրիտանիայի օրենքների համաձայն՝ արտադրողները չեն կարող խաղալիքի կշռի 0.1 տոկոսից բարձր ֆտալատներ օգտագործել։

Կարճ շղթայով քլորացված պարաֆինների սահմանաչափը 0.15 տոկոս է:

Սակայն հետազոտությունւ ցույց է տվել, որ նոր խաղալիքների 30 տոկոսն այս սահմաններից բարձր մակարդակներ է պարունակում: