Մարդկանց թոքերում առաջին անգամ միկրոպլաստիկ են հայտնաբերել

Ողջ պացիենտների թոքերի հյուսվածքում առաջին անգամ պլաստիկի մանրագույն մասնիկներ են հայտնաբերել։ Մեծ Բրիտանիայի Հալլի համալսարանի եւ Քասլ Հիլ հիվանդանոցի գիտնականներն այս մասին հայտնում են Science of the Total Environment ամսագրում հրապարակված հոդվածում:

Գիտնականները ուսումնասիրել են թոքերի հյուսվածքի նմուշները, որոնք հավաքվել են Քասլ Հիլ հիվանդանոցում թոքերի տարբեր հիվանդությունների բուժման համար վիրահատությունների ժամանակ: Ընդամենը հետազոտվել է 13 նմուշ, որից 11-ում պլաստիկի մասնիկներ են եղել։ Ընդհանուր առմամբ, գիտնականները հայտնաբերել են պլաստիկի 12 տեսակ, այդ թվում այնպիսիները, որոնք օգտագործվում են սովորական կենցաղային նպատակներով՝ հագուստի պատրաստման, փաթեթավորման եւ շշերի արտադրության համար:

Միկրոմասնիկները հայտնաբերվել են ոչ միայն թոքերի վերին, այլեւ ստորին մասերում, որտեղ, ինչպես նախկինում համարվում էր, շնչուղիները չափազանց նեղ են, ինչը պետք է դժվարացներ մասնիկների մուտքը դրանց մեջ:

Հետաքրքիր է, որ արական սեռի պացիենտների մոտ ավելի շատ պլաստիկ է հայտնաբերվել, քան կանանց մոտ:

Ըստ հետազոտողների՝ դեռեւս հայտնի չէ, թե միկրոպլաստիկն ինչ ազդեցություն կարող է ունենալ մարդու առողջության վրա։