Միջերկրածովյան դիետան կարող է օգտակար լինել COVID-19-ի դեմ

Միջերկրածովյան դիետան կարող է նվազեցնել ծանր COVID-19-ի զարգացման ռիսկը։ Դա պարզել են Magna Græcia համալսարանի իտալացի գիտնականները։ Նրանց հետազոտության մասին հաղորդվում է Medicina ամսագրում հրապարակված հոդվածում:

Հետազոտության հեղինակներն ուսումնասիրել են միջերկրածովյան սննդակարգի հնարավոր ազդեցությունը կորոնավիրուսային վարակի զարգացման ռիսկի վրա։ Հայտնի է, որ Իտալիայի, Իսպանիայի, Հունաստանի եւ այլ երկրների բնակիչների կողմից ավանդաբար օգտագործվող մթերքները կապված են ընդհանուր մահացության, քաղցկեղի եւ սրտանոթային հիվանդությունների ավելի ցածր ռիսկի հետ։

Միջերկրածովյան սննդակարգը մի շարք վիտամիններ, հանքանյութեր, ճարպաթթուներ եւ ֆիտոքիմիկատներ է պարունակում, որոնք պոտենցիալ հակակորոնավիրուսային ակտիվություն ունեն: Առողջ ուտելու սովորություններն ազդում են բորբոքման եւ իմունային համակարգի վրա եւ կարող են պաշտպանիչ ազդեցություն ունենալ SARS-CoV-2 կորոնավիրուսի հետեւանքով առաջացած սուր շնչառական համախտանիշի դեմ:

Հիշեցնենք, որ միջերկրածովյան սննդակարգը բանջարեղենի, մրգերի, ընկույզների, լոբազգիների (ոլոռ, լոբի եւ ոսպ), չզտված ձիթապտղի յուղ եւ մեծ քանակությամբ ձուկ է ներառում: Նման դիետան գրեթե բացառում է հագեցված ճարպեր պարունակող մթերքները, մասնավորապես՝ կաթնամթերքը, միսը եւ թռչնամիսը։ Միջերկրածովյան սննդակարգում հաճախ ընդգրկված է նաեւ գինու չափավոր օգտագործումը: