Ի՞նչպիսի խնդիրների մասին կարող է վկայել գիշերային քրտնարտադրությունը

Գիշերային քրտնարտադրությունը, որը կապված չէ ննջասենյակում չափազանց բարձր ջերմաստիճանի հետ, կարող է վկայել որոշ խնդիրների եւ հիվանդությունների մասին:

Հորմոնալ խնդիրներ

Հորմոնալ համակարգի հետ կապված խնդիրները կանանց մոտ բավականին հաճախ գիշերային քրտնարտադրության են հանգեցնում: Այս խնդրի պատճառը, օրինակ, կարող է լինել էստրոգենի ցածր մակարդակը կամ տատանումները: Բացի այդ, դա կարող է տեղի ունենալ երեխայի ծնվելուց հետո, հակաբեղմնավորիչ հաբեր ընդունելուց, ինչպես նաեւ պերիմենոպաուզի եւ մենոպաուզայի ժամանակահատվածներում:

Դեղամիջոցներ

Որոշ դեղամիջոցներ, ինչպիսիք են հակադեպրեսանտները, նույնպես կարող են գիշերային քրտնարտադրության հանգեցնել:

Շաքարի մակարդակն արյան մեջ

Մարդը կարող է նաեւ քրտնել գիշերը հիպոգլիկեմիայի՝ արյան մեջ շաքարի ցածր մակարդակի պատճառով: Այս խնդրին կարող է հանգեցնել ինսուլինի կամ շաքարախտի դեմ պերորալ դեղամիջոցների ընդունումը:

Սթրես

Սթրեսը եւս կարող է գիշերային քրտնարտադրության հանգեցնել: Բանն այն է, որ սթրեսն ազդում է մակերիկամների աշխատանքի եւ դրանց վրա կորտիզոլ հորմոնի արտադրության վրա, ինչն ազդում է նաեւ քրտնարտադրության առանձնահատկությունների վրա:

Հիպերհիդրոզ

Այս խնդրով մարդկանց մոտ մարմինը կարող է առանց որեւէ բժշկական պատճառի քրտինք արտադրել: Սովորաբար այս խանգարմամբ մարդիկ քրտնում են մարմնի որոշակի տարածքներում, իսկ դրա մնացած մասը չոր է մնում:

Վտանգավոր հիվանդություններ

Գիշերային քրտինքը կարող է նաեւ այնպիսի հիվանդությունների ախտանիշ լինել, ինչպիսիք են տուբերկուլյոզը, ՄԻԱՎ-ը, լեյկոզը, քաղցկեղը (հատկապես՝ լիմֆոման): Բայց, որպես կանոն, նման հիվանդությունների դեպքում նաեւ այլ ախտանիշներ են ի հայտ գալիս, որոնք կարելի է նկատել օրվա ընթացքում: