Նիկոլը հենց հիմա պիտի հրաժարական տա․․․ Միքայել Մինասյան

Նիկոլը հենց հիմա պիտի հրաժարական տա։ ՔՊ-ն եւ ՔՊ-ամերձները ժամանակավոր կառավարություն լինելու քաղաքական եւ բարոյական մանդատ չունեն: Այս մասին Facebook-ի իր էջում գրել է Վատիկանում ՀՀ նախկին դեսպան Միքայել Մինասյանը:

Նա, մասնավորապես, գրել է․

«Հայրենիք կործանած ու տասնյակ հազարավոր մարդկային ճակատագրեր խեղած Նիկոլը որոշել է երկարաձգել իր քաղաքական կյանքը արտահերթ ընտրություններ կազմակերպելու ճանապարհով, ինչը կերաշխավորի գոնե նախընտրական շրջանում աթոռի վրա իր մնալը:

Իսկ դա քիչ ժամանակ չէ ամենը տապալած իշխանության համար։ ՔՊ-ն էլ դեմքի լուրջ արտահայտությամբ ընտրությունների գաղափարը քննարկում է մարդ-կուսակցությունների հետ՝ թե տեսեք մենք մեր ստորության մեջ միայնակ չենք։

Այն, որ ընտրություն պետք է, անհերքելի է։ Բայց կարեւորը դա չէ։ Կարեւորն այն է, թե ինչ պետք է արվի, որ Նիկոլ Փաշինյանի քաղաքական «դիակը» հեռացվի հիմա եւ ինչ պետք է արվի մինչեւ ընտրությունները։

Մինչեւ այդ, պետք է լինի այս խայտառակ պարտության քաղաքական հետեւանքների գնատական եւ արձագանք։

Մասնավորապես՝

-Պետք է տալ այս պարտության քաղաքական ու ազգային գնահատականը,

-քրեական գործընթաց սկսել պետական դավաճանների եւ ռազմական հանցագործների նկատմամբ,

-հետաքննել իշխանազավթման ամբողջ գործընթացը,

-վերջին 2.5 տարիների կատարվածը դիտարկել հայրենազրկում՝ ծրագրված, նպատակադրված ու իրականացված տրամաբանության ներքո,

-բացահայտել ֆեյքային ինդուստրիան, որը սպասարկել է այս գործընթացները եւ այն ֆինանսավորողներին,

-պատասխանատվության ենթարկել բոլոր պաշտոնյաներին եւ իրավապահ մարմինների ներկայացուցիչներին, որոնք օրենքների խախտմամբ կատարել են ապօրինի հրամաններ,

-բացահայտել օտարերկրյա բոլոր գործակալական ցանցերը,

-հրապարակել բոլոր այն «պոպուլյար» եւ կարծիք ձեւավորող հանրային դեմքերի անունները, որոնք խեղել են հանրային կարծիքը միտումնավոր, ուղիղ հրահանգներով,

-պատժել ռազմական այն բոլոր գործիչներին, որոնք հասկանալով հանդերձ, կատարել են ճակատագրական հանձնարարություններ,

-հայտնաբերել ու պատժել նրանց, որոնք մասնակից են դիերը թաքցնելու գործընթացին,

-հայտնաբերել ու պատժել նրանց, ում մեղքով պատերազմից հետո շարունակել ենք ունենալ գերիներ ու նոր սպանվածներ։

Ահա այսքանից հետո, երբ ճշմարտությունը, մեղավորներն ու պատճառները կբացահայտվեն, պետք է հայտարարվեն նոր ընտրություններ։

Ընտրություններ, որտեղ ՀՀ քաղաքացիներն արդեն ամեն ինչ իմացած ու տեղեկացված, կհասկանան ում ընտրեն կամ ում չընտրեն։ Որովհետեւ բոլոր մնացած դեպքերում, եթե այսքանը չարվի, ընտրությունը կլինի ստի վրա կառուցած՝ մի ամբողջ ժողովուրդ խաբելու հերթական բեմականացում։

Պարտված երկիրը չի կարող ավտոմատ գնալ ընտրությունների։ Պետք է վերլուծել, հասկանալ, գտնել մեղավորներին, պատժել, բարձրաձայնել ճշմարտությունը եւ հետո արդեն ձեւավորել ինքնամաքրված հասարակության՝ նոր էջից սկսող իշխանություն։

Այդ պատճառով հիմա միակ պահանջն է՝ Նիկոլը պիտի հրաժարական տա առանց որեւէ պայմանի։

Պետք է ձեւավորվի ժամանակավոր կառավարություն 3 գլխավոր նպատակով ու գործառույթով.

1. Վերագործարկի կոլապսի ենթարկված պետական իշխանությունը, ապահովի Հայաստանի, Արցախի եւ վերջապես մարդկանց անվտանգությունը,

2. կանխի տնտեսական կոլապսը, որին մնացել են հաշված շաբաթներ,

3. պատժի պատերազմի եւ կապիտուլյացիայի մեղավորներին։

Այսքանը։ Պարզ, հասկանալի բոլորի համար։ Հատկապես նիկոլականների, որոնք անկեղծորեն մտածում են, որ հայրենազրկումից հետո կարող են սակարկել կամ պայմանավորվել։ Չի լինելու։ Դուք քաղաքական դիակներ եք եւ կապիտուլյանտներ։ Դուք այլեւս իրավունք չունեք անգամ հանդգնելու որեւէ համապետական պրոցես իրականացնել։ Ո՞վ եք դուք, այ դավաճաններ։ Ձեր կարծիքով դուք որեւէ բան ներկայացնելու իրավունք ունե՞ք. դե գնացեք Եռաբլուրից ասեք, որ դեռ պաշտոնավարելու կամ որեւէ գործընթաց կազմակերպելու բարոյական իրավունք ունեք:

Ձեր հետ պայմանավորվածությունը կարող է ընդամենը մեկը լինել. ձեզ դատող դատավորը կարող է չլինել Ֆարխոյանի ցուցակից Կարենը, Մնացը կամ Արտուշը։ Նրանք ձեր գրպանային, կամազուրկ դահիճներներն էին։ Ժամանակավոր կառավարությունը կերաշխավորի արդար դատաքննություն։

Նիկոլը հենց հիմա պիտի հրաժարական տա։ ՔՊ-ն եւ ՔՊ-ամերձները ժամանակավոր կառավարություն լինելու քաղաքական եւ բարոյական մանդատ չունեն: Հետեւաբար չեն կարող ունենալ նաեւ ո՛չ հավակնություն, ո՛չ թեկնածու։ Սակարկությունն անպատեհ է։

Ու չի լինելու։

Իզուր Մոսկվաներում կաբինետից կաբինետ մի վազեք։

Չի ստացվելու, չենք թողնելու։