Եթե Փաշինյանն արժանապատվություն ունենար, ուղղակի ինքնասպան կլիներ. Անդրանիկ Թեւանյան

Չի կարող լինել մարդ, որը համակերպվի այս կապիտուլյացիայի հետ, եւ չի կարող լինել մարդ, որը համակերպվի այն ղեկավարի հետ, որը մեր պետությանը տարավ պարտության՝ ստի ու կեղծիքի միջոցով։ Այս մասին այսօր՝ դեկտեմբերի 14-ին, Երեւանում տեղի ունեցող արժանապատվության երթի ավարտից հետո լրագրողների հետ զրույցում նշեց քաղաքագետ Անդրանիկ Թեւանյանը։

Նա շեշտեց, որ այս պայքարը շարունակվելու է մինչեւ Նիկոլ Փաշինյանի հեռացումը. «Այստեղ անձնական խնդիր չկա, այստեղ սիմվոլիզմի խնդիր կա։ Եթե ինքն արժանապատվություն ունենար, ուղղակի ինքնասպան կլիներ, գոնե հրաժարական կտար։ Ինքն ասում է՝ ես չեմ ուզում հեռանալ. հասկանում եմ, որ ինքը վախենում է, բայց մեր ժողովուրդն իրեն պետք է տա այն երաշխիքը, որովհետեւ ինքը մեզ ողջ ու առողջ է պետք, ինքն ահագին բաներ ունի պատմելու»։

Քաղաքագետի խոսքով՝ եթե մենք Նիկոլ Փաշինյանին երկար հանդուրժենք, Հայաստանի գոյության հարցը կառաջանա. «Ամեն օր փոքրանում ու նվազում ենք, կարող է արտագաղթի մեծ ալիք բարձրանալ։ Մենք դա պետք է կանխենք, պետք է ժողովրդին հույս ու հավատ տանք։ Յուրաքանչյուր քաղաքացի իր մեջ պետք է որոշում կայացնի՝ ուզո՞ւմ է ունենալ Հայաստանի Հանրապետություն, թե՞ ոչ, ուզո՞ւմ է ապրել այս երկրում, թե՞ ոչ, ուզո՞ւմ է թուրքի գերի չդառնալ, թե՞ ոչ. այս հարցի պատասխանները շատ պարզ են»։

Անդրանիկ Թեւանյանը շեշտեց, որ եթե իրենք չեն փոխում քաղաքական այդ իրավիճակը, դա համազգային խայտառակության է վերածվում. «Այստեղ կա նաեւ անվտանգության խնդիր. մեզ հետ ուղղակի ոչ ոք չի բանակցելու, մեզ հետ որեւէ տնտեսական ներդրումների ծրագիր չի իրականացվելու, մեր ժողովուրդը կարող է սովի մատնվել»։

Անդրադառնալով Արցախի հարցով բանակցային գործընթացին՝ քաղաքագետը կարծիք հայտնեց, որ ԵԱՀԿ Մինսկի խմբի շրջանակներում պետք է փորձեն վերանականգնել բանակցային գործընթացը. «Պետք է փորձենք որոշակի լուծումներ դնել սեղանի վրա։ Նիկոլ Փաշինյանի դեպքում դա հնարավոր չի, որովհետեւ նա փակուղի մտցրեց բանակցությունները՝ նպաստելով պատերազմի սկսմանը»։