Երբ հասկացավ՝ չի կարողանալու հաղթել ու չի ուզում առանց մարտերի հողեր հանձնել, պետք է հրաժարական տար. Վանեցյան

Երբ Փաշինյանը ստանձնում էր ՀՀ վարչապետի պաշտոնը, պետք է քաջ գիտակցեր, որ Հայաստանում ամենամեծ չլուծված խնդիրներից մեկն Արցախյան հակամարտության հարցն է, որի լուծումը պետք է տրվեր: Այս մասին, «Ազատություն» ռադիոկայանի հետ զրույցում ասել է «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը:

Նա ընդգծեց, որ անձամբ մի քանի անգամ վարչապետին ասել է, որ եթե Արցախյան համակարտության հարցի վերաբերյալ չկան բանակցություններ, կոնկրետ աշխատանք՝ այլընտրանքը պատերազմն է: Մինչդեռ, ԱԱԾ նախկին տնօրենի խոսքով՝ մենք պատրաստ չէինք պատերազմելու, որովհետև ի սկզբանե տեղեկություններ կային, որ Թուրքիան էլ է ներգրավվելու:

«Ասել եմ և ոչ միայն իրեն, այլև Ազգային անվտանգության խորհրդի նիստերին: Փաշինյանը ներքին լսարանի համար խոսում էր տարբեր բաների մասին, պոպուլիստական հայտարարություններ էր անում՝ «Արցախը Հայաստանն է և վերջ», «Ես բանակցությունները սկսում եմ իմ կետից», «որևէ զիջման չեմ գնալու» և այլ: Ունեցանք պատերազմ և չկարողացանք հաղթել», - արձանագրեց Արթուր Վանեցյանը:

Ըստ նրա՝ երբ Նիկոլ Փաշինյանը հասկացավ, որ պատերազմ է սկսվել և ինքը չի կարողանալու հաղթել ու չի ուզում առանց մարտերի հանձնել հողերը, իր մեջ պետք է քաջություն գտներ, ի սկզբանե հայտարարեր իր հրաժարականի մասին. «Կլիներ քաղաքական փոփոխություն, ինչը կստիպեր միջազգային գործընկերներին կանգնեցնել այս պատերազմը: Նա չարեց»: