«Այսօր փառահեղ տոն է». Արթուր Վանեցյանի շնորհավորական ուղերձը՝ Անկախության տոնի առթիվ
«Հայրենիք» կուսակցության նախագահ Արթուր Վանեցյանը շնորհավորական ուղերձ է հղել Անկախության տոնի առթիվ։
Ուղերձում, մասնավորապես, ասվում է.
«Այսօր փառահեղ տոն է. 29 տարի առաջ այս օրը մեր ժողովուրդը միաձայն «այո» ասաց անկախ պետականությունը վերականգնելու համազգային վճռականությանը՝ հավատով, որ ստեղծելու ենք ժողովրդավարական, տնտեսապես հզոր, անվտանգ ու մրցունակ պետություն։
Հայրենիքը, պետությունը եւ պետականությունը բարձրագույն արժեքներ են։ Հազարամյակներ շարունակ մենք պայքարել ենք՝ տեր կանգնելու մեր ինքնությանը եւ պահպանելու մեր տեղն ու դերը աշխարհի քարտեզի վրա։ Իսկ անկախ պետականությունը եւ ազգային ինքնությունն ընդամենը բարեհունչ բառակապակցություններ են, եթե դրանց ողնաշարն անառիկ սահմանը չէ, համախմբված, խոհեմ ժողովուրդը, ամրակուռ ու մարտունակ բանակը, անսասան եկեղեցին, անխոցելի լեզուն եւ մշակույթը, ամուր ընտանիքը։ Բավական է դիպչել ազգապահպան այս շղթայի օղակներից թեկուզ մեկին, որպեսզի վտանգենք այն, ինչ ձեռք ենք բերել դարավոր պայքարի եւ սրբազան հողի համար զոհաբերված կյանքերի գնով։
Սեպտեմբերի 21-ը ոչ միայն անցած ճանապարհը վերաարժեւորելու, վրիպումները դիտարկելու, ձեռքբերումներով հպարտանալու, այլեւ խոնարհումի օր է։ Սա այն օրն է, երբ պետք է հարգանքի տուրք մատուցենք Հայրենիքի՝ նաեւ արցախյան սահմաններն իրենց արյամբ անխոցելի պահած մեր հերոսների հիշատակին, որոնցից շատերը չէին հատել այսօրվա անկախ Հայաստանի տարիքի շեմն անգամ։
Երիտասարդությունն այն տարիքն է, երբ ուզում ես, կարողանում ես եւ համարձակվում ես։ Եվ այո՛, պետք է օգտվել տարիքի առավելություններից։ Սակայն խոհեմ սերնդին է բնորոշ իմաստունին լսելու, փորձառուի կարծիքը հարցնելու, շրջահայացի խորհուրդները հաշվի առնելու քաջությունը։ Սնապարծությունն ական է, արատ, որը կործանում է նրան, ով նվաստացնում է իրենից խելոքին, փակում ականջները քննադատության առջեւ, սեփական գործողությունները չի վերլուծում եւ ամենակարեւորը՝ ժամանակին կանգ չի առնում։
Որքան ազգանվեր, լրջախոհ ու պատասխանատու կառավարումը կարող է լինել փրկարար, նույնքան ապազգային, անփույթ ու իմաստակին վայել վարքագիծը կարող է լինել կործանարար։ Իսկ մեր հայրենիքը չի կարող գնալ կործանման ճանապարհով։ Թույլ չե՛նք տա, նույնիսկ եթե անհավասար մարտի բռնվենք։
Հաղթում է նա, ով ապավինում է խելքին, փորձին, ուժին ու ամենակարեւորը՝ ազգային ոգուն եւ Աստծուն։ Իսկ Աստված օրհնում է արդարի ճանապարհը։
Շնորհավո՛ր, Անկա՛խ Հայաստան։
Շնորհավո՛ր, Անկա՛խ Հայաստանի քաղաքացի։
Շնորհավո՛ր, աշխարհասփյու՛ռ հայություն»։
Ապարանից մինչև Սպիտակի ոլորաններ կատարվում են գծանշման աշխատանքներ․ հնարավոր են երթևեկության սահմանա...
Իսպանիայի Տեներիֆե–Անդորրա հանդիպումն ավարտվել է սարսափելի միջադեպով (տեսանյութ)
Սահմանվել է Ռուսաստանի Դաշնությունից ՌԴ կանխիկ արժույթի արտահանման արգելք
Եվրահանձնաժողովն իր աջակցությունն է հայտնել Լեհաստանի վարչապետին
Գերմանիայում խաղաղ երթերը վերածվել են անկարգությունների, վանդալիզմի և խանութների թալանի
Երեք ծառայողի նկատմամբ կիրառվել է Ծառայության դադարեցում կարգապահական տույժը (տեսանյութ)
Անցում զենքի պարզ մատակարարումից դեպի ավելի խորը ռազմատեխնիկական փոխգործակցություն
Նեթանյահուն Թրամփին հորդորում է հարվածել Իրանին ԱՄՆ միջանկյալ ընտրություններից անմիջապես հետո
Օլեշկիից տարհանված ուկրաինացիները Ուկրաինայում են
Իրանը պատրաստ է 48 ժամվա ընթացքում բացել Հորմուզի նեղուցը՝ իր պայմանները կատարելու դեպքում