Տպավորություն է՝ 17 մարդու մահը չի հետաքրքրում ոչ ոքի. Արման Աբովյան

Ինձ մոտ տպավորություն է, որ ալկոհոլային թունավորումից 17 մարդու մահը առանձնապես չի հետաքրքրում ոչ ոքի։ Այս մասին ֆեյսբուքյան իր էջում գրել է ԲՀԿ պատգամավոր Արման Աբովյանը։

Նա, մասնավորապես, գրել է.

«Իսկ ո՞վ է պատասխան տալու։

Օգոստոսի 31֊ից մինչեւ սեպտեմբերի 5֊ը, Հայաստանում գրանցվել է ալկոհոլային թունավուրումների աննախադեպ աճ։

5 օրվա ընթացքում թունավորվել է 46 մարդ, որոնցից ունենք 17 զոհ։

Պատկերացնու՞մ եք՝ 17 զոհ ալկոհոլային թունավորումից մի քանի օրվա ընթացքում։

Այո, իրավապահները հայտարարել են, որ աշխատում են պատճառների եւ մեղավորների բացահայտման ուղղությամբ, բայց հազար ներողություն, իսկ համապատասխան մարմիններից ինչո՞ւ առարկայական առումով «ձեն֊ձուն չկա», սննդի անվտանգության ոլորտի պատասխանատուներից օրինակ, համոզված եմ, որ ամեն օրվա ռեժիմով պետք է տեղեկություն լինի, թե ի՞նչ աշխատանքներ են կատարվում, որ հանկարծ նման դեպքեր չկրկնվեն։

Ինձ մոտ տպավորություն է, որ 17 մարդու մահը առանձնապես չի հետաքրքրում ոչ ոքի։

Եվ ի վերջո, չկա պատասխան, թե ի՞նչ պետք է անել, որ խուսափենք այս ահավոր իրավիճակի կրկնումից։

ՀԳ

Եթե հանկարծ ավտովթարից 17 մարդ մահանար (Աստված հեռու պահի ), ապա համոզված եմ, որ երկրում սուգ կհայտարարվեր...

ՀԳԳ

Խոստանում եմ, որ իմ բոլոր լիազորությունները կօգտագործեմ, օրենսդրական դաշտում խիստ կարգավորումներ առաջարկելու համար, որոնք կնվազեցնեն այսպիսի դեպքերի կրկնությունը ապագայում։

Ժողովուրդ...17 մարդ է մահացել»։