Հանգստյան գոտի Սեւանում, որտեղ ինտերնետը կարգավորում է ԱԺ պատգամավորը

Սեւանի White Shorja հանգստի գոտու տնօրեն Արտյոմ Մելքումյանը հայտարարել է, թե ԱԺ իմքայլական պատգամավոր, Նիկոլ Փաշինյանի մերձավոր շրջապատի անդամ Հայկ Սարգսյանն իրենց համակարգչի առջեւ էր հայտնվել հենց իրենց խնդրանքով, որ ինտերնետը կարգավորի:

Լիլիթ Մակունցը, որը ԱԺ Իմ քայլը խմբակցության առաջնորդն է, պնդում էր, թե Հայկը փարթիում պատահաբար է հայտնվել: Հիմա ստացվում է, որ պատահաբար, մի պահ այնտեղ հայտնված Հայկը նաեւ հանգստյան գոտու ինտերնետն է կարգավորել: 

Եթե այս հանգստյան գոտու ինտերնետը կարգավորում է ԱԺ պատգամավոր Հայկ Սարգսյանը, ապա կարող ենք ենթադրել, որ այնտեղ բարմենը պետք է պարտադիր լինի ԱԺ պատգամավոր, օրինակ, ԱԺ փոխխոսնակ Ալեն Սիմոնյանը:

Եթե ինտերնետը կարգավորում է ԱԺ պատգամավորը, ապա ինչու մենեջերը չպետք է լինի պատահաբար մի պահ այնտեղ հայտնված Լիլիթ Մակունցը, որը պատահաբար այնտեղ մի պահ տեսած կլինի Հայկ Սարգսյանին:

Նման կարգի հանգստյան գոտիների հավաքարարները եւս լինում են ԱԺ պատգամավոր, եւ չենք զարմանա, որ մի պահ այնտեղ հայտնված լինեն ԱԺ պատգամավոր Արփինե Դավոյանը եւ Հռիփսիմե Գրիգորյանը, որոնց խնդրած լինեն մաքրել տարածքը, հատկապես, որ Հռիփսիմե Գրիգորյանը նման փորձ արդեն ունի՝ Բաղրամյան փողոցում գորգ մաքրելուց հետո:

Ինտերնետ կարգավորող Հայկ Սարգսյան, իսկ ինչու դիջեյը չպետք է լինի Մխիթար Հայրապետյանը: Նա հաստատ լավ կտժժացնի, հատկապես, որ ձեռքերը վեր պարզելու շարժումը, ասում են, որ իր գլխում է ծագել:

Իսկ եթե դիջեյը նման հանգստյան գոտում  Մխիթար Հայրապետյանն է, ապա մատուցողները եւս պետք է լինեն ԱԺ պատգամավորներ, որոնք, իհարկե, կրկին այնտեղ պետք է պատահաբար հայտնված լինեն: Եւ ահա, տրամաբանական է թվում, որ մատուցողները եղել են ԱԺ պատգամավորներ Հովիկ Աղազարյանը, Լուսինե Բադալյանը՝ Լուլուն, Նիկոլայ Բաղդասարյանը, Սիսակ Գաբրելյանը, Քրիստինե Պողոսյանը եւ Արարատ Միրզոյանը:

Դե իսկ այս ամենն անիմաստ կլիներ, եթե կենդանի կատարումներով աչքի չընկներ, ներկաներին չուրախացներ մի պահ այնտեղ խիստ պատահաբար հայտնված ԱԺ պատգամավոր Վահագն Հովակիմյանը, որը վերջերս հանդիսատեսի առջեւ ելույթի մեծ փորձ կուտակեց Ազգային ժողովում ունեցած իր կատարումներով:

Այսպիսին է Հայաստանն այսօր, որտեղ պատգամավորները պատահաբար հայտնվում են հանգստյան գոտում անցկացվող փարթիին եւ կարգավորում նույն հանգստյան գոտու ինտերնետը:

Top-News.am-ի

հումորի եւ պարանորմալ երեւույթների բաժին