Այսքան ուրախ կյանքը մեզ ընկեր Նիկոլն է պարգեւել

Իմքայլական պատգամավոր, Նիկոլ Փաշինյանի մտերիմ Հայկ Սարգսյանը կրկին սկանդալի կենտրոնում է եւ կրկին արժանանում է Նիկոլ Փաշինյանի պաշտպանությանն ու հովանավորությանը:

Այս անգամ Նիկոլ Փաշինյանի սիրելի պատգամավորը որոշեց քեֆ-ուրախություն կազմակերպել Սեւանի ափին, իսկ Տավուշի արյունալի մարտերից դեռ երկու շաբաթ էլ չի անցել, դեռ կրակում են, դեռ թշնամու դիպուկահարները թիրախավորում են դիրքերում կանգնած մեր զինվորներին:

Դիմակ-միմակները մի կողմ, սոցիալական հեռավարությունը մի կողմ. պատգամավորը քեֆ է կազմակերպում տավուշյան մարտերից մի քանի օր անց: «Իմ քայլը», Նիկոլ Փաշինյանը պետք է տեղի ունեցածի վերաբերյալ հստակ վերաբերմունք արտահայտեն, չնայած իմքայլականների խմբակցության ղեկավար Լիլիթ Մակունցն արդեն այդ վերաբերմունքն արտահայտել է, որը ոչ պակաս ցինիկ է, քան բուն հավաքույթ-ուրախությունը:

«Քիչ առաջ հեռախոսազրույց եմ ունեցել Հայկ Սարգսյանի հետ: Նա ինձ տեղեկացրեց, որ ինքը որեւէ միջոցառում չի կազմակերպել, գտնվում է մի քանի օրով հանգստյան գոտում, որտեղ նաեւ այլ քաղաքացիներ են հանգստանում: Տեղեկացրեց, որ անզգուշություն է թույլ տվել՝ մի պահ գտնվելով մարդաշատ վայրում, որտեղ եղել է առանց դիմակի: Հայցում էր «Իմ քայլը» խմբակցության ներողամտությունը, որ անզգուշություն է թույլ տվել»,- ասել է Մակունցը:

Լինենք անկեղծ, Մակունցի այս հայտարարությունն ավելի ցինիկ եւ անբարոյական է, քան բուն միջոցառման անցկացումը: Այսպիսի ցինիզմ, այսպիսի անբարո պահվածք չէր ակնկալում հայաստանցին, որը 2018-ի ապրիլ-մայիսին փողոցում աջակցում էր Փաշինյանին:

Նորմալ, անգամ կիսանորմալ երկրներում պատգամավորն արդեն հրաժարական տված կլիներ, արդեն հրաժարական տված կլիներ նաեւ Մակունցը, իսկ վարչապետը գուցե եւս հրաժարական ներկայացներ: Իսկ մեզ մոտ գործում են «Անասնաֆերմայի» օրենքները՝ օրենքի առաջ հավասար են բոլորը, բայց ոմանք ավելի հավասար են:

Երեւանի կենտրոնում երիտասարդ աղջկա ձեռքը ոլորում են, ձեռնաշղթա հագցնում եւ տանում ոստիկանության բաժին, Սեւանի ափին հանգստացող շարքային քաղաքացիներին պարտադրում են դիմակ կրել եւ քաշքշում են, իսկ ոմանք Սեւանի ափին անդիմակ մարդաշատ քեֆ են կազմակերպում, վստահ լինելով, որ ոչինչ էլ չի լինելու եւ արժանանալու է Փաշինյանի անվերապահ աջակցությունը, որ ասելու է, թե ոչ այդ հանգստյան գոտու հետ կապ ունի, ոչ էլ՝ քեֆ-ուրախության: Իսկ հիմա Հայկ Սարգսյանը հաստատ մի տեղ քմծիծաղ է տալիս հանրության վրա եւ շշնջում՝ Այսքան ուրախ կյանքը մեզ ընկեր Նիկոլն է պարգեւել:

Վարդան Մխիթարյան

Top-News.am