Բոլորին անխտիր կգտնենք եւ պատասխանատվության կենթարկենք․ Ալիեւ

Ադրբեջանի նախագահ Իլհամ Ալիեւը երկրի ընդդիմությանը մեղադրել է հեղաշրջում նախապատրաստելու մեջ: Նա այդ մասին հայտարարել է նախօրեին, փոխանցում է AzerTAc-ը:

Հիշեցնենք, որ առաջնագծում կրած պարտությունից հետո Ադրբեջանի իշխանություններն «ինքնաբուխ ժողովրդական հանրահավաք» էին կազմակերպել, ընդ որում՝ «հաղթանակը» տոնելու համար․․․ Հանրահավաքում հնչեցվեցին այդ թվում նաեւ ընդդիմադիր կարգախոսներ եւ անհապաղ մոբիլիզացման կոչ: Գաղափարը կյանքի կոչելու համար ամբոխը ներխուժեց խորհրդարանի շենք: Տեղի ունեցածը, չնայած իշխանությունների համար ակնհայտորենշահեկան լինելը, ներկայացվեց որպես «ընդդիմության ինտրիգներ» եւ արդեն «պտուտակները ձգելու» պատճառ դարձավ:

«Որոշ կեղտոտ տարրեր՝ «Ադրբեջանի ժողովրդական ճակատի» անդամները, օգտվելով դրանից, փորձեցին անկարգություններ հրահրել, ներխուժեցին խորհրդարանի շենք, որտեղ ավերածություններ գործեցին: Ի՞նչ կապ կա խորհրդարանի շենքի եւ տարած հաղթանակի միջեւ: Եվ հետո դա հաղթանակ է, որը բոլորն են ճանաչում: Հայաստանն արդեն ստիպված է ընդունել դա: Այս օրերին մենք դրսից մեծ աջակցություն տեսանք: Այսինքն՝ ժողովրդի կամքն իրականություն դարձավ, դա պետք է նշել: Բայց ինչու՞ էր պետք քանդել, ջարդել պատերը, գրասենյակները խորհրդարանի շենքում: Նրանք բարձրացան երրորդ հարկ, ջարդեցին գրասենյակների դռներն ու ապակիները: Դու ի՞նչ է՝ եկել ես ոչնչացնել օրենսդիր բարձրագույն մարմինը: Ո՞վ կարող է դա անել: Թշնամին, ուրիշ ոչ ոք»,- ասել է Ալիեւը՝ դրանով իսկ հայտարարելով ԱԺՃԿճ-ի դեմ գործողությունների հաջորդ փուլի մեկնարկի մասին։

«Հիմա քննություն է ընթանում: Չեմ ուզում քննությունից առաջ ընկնել: Ընդհանրապես մտադիր չեմ միջամտել: Բայց ամեն ինչ ակնհայտ է: Հիմա արդեն հանրությանը ներկայացված են որոշ տեսակադրեր: Տեսեք, թե որքան խղճուկ ու անօգնական տեսք ունեն այդ մարդիկ: Որտեղ է նրանց «խիզախությունը», որտե՞ղ է նրանց «հերոսականությունը»: Հիմա նրանք պատասխան կտան օրենքի առաջ: Ես ասել եմ, մեկ անգամ էլ եմ ցանկանում ասել՝ այս հանցագործությունները, այս գործողությունները կատարած ոչ մի մարդ չի կարող պատասխանատվությունից խուսափել: Բոլորին մեկ առ մեկ կգտնենք եւ գտնում ենք: Բոլորին մինչեւ վերջին մարդը կգտնենք եւ պատասխանատվության կենթարկենք: Թող ժողովուրդը նրանց ճանաչի: Թող նրանց ծնողներն ամաչեն, թե ում են մեծացրել: Ինչ մանկուրտների են մեծացրել: Ուստի հանրությունը պետք է դա իմանա: Ոչ միայն նրանք, նրանց ծնողներն էլ են պատասխանատվություն կրում»,- հայտարարել է Ալիեւը՝ հիշեցնելով 1992 թվականը. «Ադրբեջանի Ազգային ճակատի իրականացրած հեղաշրջումը սկսվել է խորհրդարանի շենքի գրավումով, այնտեղ էլ ավարտվել է: Այդ կադրերը կան, հեռուստաալիքները, հավանաբար, դրանք կցուցադրեն»: