Ճիշտ կլիներ, որ Ադրբեջանի դիվերսիոն գործողությունների վերաբերյալ 3 խորհրդարանական խմբակցություններով միասնական ուղերձ հղեինք միջազգային հանրությանը

Ընդդիմությունը սահմանում լարված օրերին իրեն պահեց այնպես, ինչպես պիտի պահի իր երկրի ապագայով մտահոգ ընդդիմությունը: «Բարգավաճ Հայաստան»-ից որևէ մեկը չփորձեց ստեղծված իրավիճակից դիվիդենտ քաղել, ավելին՝ մեր հնարավորությունների և ռեսուրսների շրջանակում մենք փորձեցինք համախմբման կոչերով հանդես գալ և ամեն մեկս մեր տեղում մեր գործն արեցինք. Այս մասին Tert.am-ի հետ զրույցում նշեց «Բարգավաճ Հայաստան» կուսակցության պատգամավոր Նաիրա Զոհրաբյանը:

«Ես՝ որպես միջազգային կառույցում աշխատող պատգամավոր, ամեն ինչ արեցի այս օրերի ընթացքում միջազգային հանրության ուշադրությունը Ադրբեջանի ագրեսիվ դիվերսիոն գործողությունների վրա սևեռելու համար: Դիմեցի միջազգային տարբեր կառույցներ՝ երեկ Եվրոպայի խորհրդի խորհրդարանական վեհաժողովի նախագահն արդեն պաշտոնապես պատասխանեց: Երեկ կրկին պաշտոնական նամակով դիմել եմ բոլոր կառույցներին Ադրբեջանի հերթական ագրեսիվ հայտարարության՝ Մեծամորի ատոմակայանի ռմբակոծելու հետ կապված: Պետք է ասեմ, որ այդ հայտարարությունը առաջացրել է բավական մտահոգություն միջազգային կառույցներում»,- նշեց նա:

Նաիրա Զոհրաբյանն ընդգծում է, որ ընդդիմությունն այս ընթացքում ինքնակազմակերպվել է, և յուրաքանչյուրն իր գործն է արել: Սակայն ճիշտ կլիներ, որ այս իրավիճակում բոլորը նստեին կլոր սեղանի շուրջ և փորձեին ամենաճշգրիտ և ռացիոնալ լուծումները գտնել, բայց դրա համար պետք է արվի առաջին քայլը, և անհանդուրժողականության և միմյանց հանդեպ թշնամանքի մթնոլորտը հաղթահարվի.

«Ճիշտ կլիներ, որ Ադրբեջանի դիվերսիոն գործողությունների և քաղաքական էլիտայի արած հայտարարությունների վերաբերյալ երեք խորհրդարանական խմբակցություններով միասնական ուղերձ հղեինք միջազգային հանրությանը: Հիմա էլ ուշ չէ, թող իմ կոչը լինի ԱԺ ղեկավարությանը ստեղծված իրավիճակի համար, քանի որ ես չեմ կարծում, որ Ադրբեջանը դասեր է քաղելու: Հատկապես «Չմիավորված երկրների շարժման համակարգող բյուրո»-ի հայտարարությունը բավականին մտահոգիչ էր մեզ համար: Մենք պետք է ճիշտ կոդեր ուղղենք միջազգային հանրությանը, և ոչ թե այս իրավիճակում ամեն քաղաքական ուժ, գործիչ, օգտվելով իր կապերից, առանձին հայտարարություն անի»:

Նաիրա Զոհրաբյանը, անդրադառնալով օրերս Մոսկվայի «Ֆուդ Սիթի» շուկայում հայերի` գյուղատնտեսական ապրանքների վաճառքն արգելելու խնդրին, նշեց, որ բեռնատարների վարորդները և ֆերմերներն առաջինն իրեն են դիմել, և գիշերը իր էջում տեղեկացրել է խնդրի մասին.

«Ես մինչև լուսադեմ զբաղված եմ եղել Ռուսաստանի տարբեր քաղաքների մեր հայրենակիցներին միմյանց կոնտակտներ փոխանցելով: Պետք է նշեմ, որ Ադրբեջանը Ռուսաստանի բոլոր խոշոր քաղաքների՝ Մոսկվա, Սանկտ Պետերբուրգ, Վորոնեժ, Վոլգոգրադ, սեփականատերերի հետ ուներ պայմանավորվածություն, որ տարբեր անհեթեթ պատճառաբանություններով թույլ չտային մեր բեռնատարների մուտքը տարածք: Սակայն ինձ զարհուրեցնում է այն հանգամանքը, որ երբ սոցիալական կայքերում տեղադրվում էր տեղեկություն այն մասին, որ Գագիկ Ծառուկյանը կամ Սամվել կարապետյանը տարածքներ են տրամադրել Ռուսաստանում մեր գյուղմթերքներն իրացնելու համար, և հանրության գերակշիռ մեծամասնությունը ողջունեց՝ համարելով հայրենասեր մարդու քայլ, գտնվեցին մարդիկ, որ նույնիսկ այդ նախաձեռնությունը փորձեցին նսեմացնել: Դա տոտալ անհանդուրժողականության և թշնամանքի ամենածայրահեղ դրսևորումն է»,-ասաց նա:

Պատգամավորի կարծիքով՝ շատ կարևոր է, որ իշխանությունը հասկանա, որ այդ ատելությունը տանում է երկիրն ուղղակի փակուղի, և այն միասնությունը, որ հայ ժողովուրդը ցույց տվեց գյուղացիական ֆերմերներին հայտարարված պատերազմի ժամանակ, դրվագային բնույթ չկրի.

«Այս հարցում կարևոր առաքելություն ունի իշխանությունը, ոչ թե պետք է սնել, այլ պետք է թշնամանքի արմատները արմատախիլ անել: Մենք այսօր ներքին թշնամիներ չունենք, մենք ունենք արտաքին թշնամիներ: Եթե մենք մեր ռեսուրսները վատնենք անընդհատ ներքին տարաձայնությունների վրա, ապա արտաքին թշնամու դիմաց մենք դուրս ենք գալու ոտաբոբիկ»,- եզրափակեց նա: