ԲՀԿ-ն չի մասնակցի սահմանադրական կարգի տապալման օրենսդրական ամրագրմանը․ Արման Աբովյան

«Բարգավաճ Հայաստան» խմբակցությունը չի մասնակցել սահմանադրական կարգի տապալման առաջին արարին, չի մասնակցելու նաեւ գործընթացն ` օրենսդրորեն ամրագրող արտահերթ նիստին: Այս մասին Ֆեյսբուքի իր էջում գրել է ԱԺ ԲՀԿ խմբակցության քարտուղար Արման Աբովյանը։

«Հարգելի հայրենակիցներ, հաշվի առնելով, որ վաղը Ազգային ժողովում գումարվող արտահերթ նիստն ունի 1 նպատակ` օրենսդրորեն փորձել ամրագրել ՀՀ-ում սահմանադրական կարգի տապալումը, «Բարգավաճ Հայաստան» խմբակցությունը, ինչպես չի մասնակցել այս գործընթացի առաջին արարին` բոյկոտելով այն, այնպես էլ վաղը մեր խմբակցությունը չի մասնակցելու արտահերթ նիստին», գրել է նա:

Արման Աբովյանը գրել է, որ հունիսի 30-ին ԲՀԿ խմբակցության անդամները նույնիսկ ԱԺ շենք մուտք չեն գործի․

«Ի տարբերություն մեր որոշ գործընկերների, որոնք, ըստ մամուլում շրջանառվող լուրերի, արդեն հունիսի 22-ին հանդիսանալով Covid-19 վարակակիր, անհրաժեշտ ձայներ ապահովելու համար այդուհանդերձ մասնակցել են Ազգային ժողովի նիստին, «Բարգավաճ Հայաստան» խմբակցության պատգամավորներից շատերը, լինելով կոնտակտավոր, ցուցաբերում են բարձր սոցիալական պատասխանատվություն յուրաքանչյուր քաղաքացու, Ազգային ժողովի յուրաքանչյուր աշխատակցի և մեր հայրենակիցների հանդեպ, ձեռնպահ ենք մնում վաղը ոչ միայն հրավիրվելիք Ազգային ժողովի արտահերթ նիստին մասնակցելուց, այլ նաև Ազգային ժողովի վարչական տարածք մուտք գործելուց: Միևնույն ժամանակ շարունակում ենք հետևել բոլոր զարգացումներին և, իհարկե, շարունակում ենք կատարել Ձեր կողմից մեզ վստահված պատգամավորի պարտականությունները`մշտապես ականջալուր լինել մեր քաղաքացիների բարձրացրած խնդիրներին», գրել է ԱԺ ԲՀԿ խմբակցության քարտուղար Արման Աբովյանը: