Եթե մարտին բոլոր միջոցառումները ճշգրտորեն և արդյունավետ անեինք, այս վիճակում չէինք լինի. Վաչե Գաբրիելյան
Տնտեսության սահմանափակումները պետք էր մտցնել ավելի շուտ, ոչ թե մարտի կեսին եւ եթե մարտին բոլոր միջոցառումները ճշգրտորեն և արդյունավետ անեինք, այս վիճակում չէինք լինի։ «Արմնյուզ» ՀԸ Դավիթ Սարգսյանի հեղինակային «#ՕրաԽնդիր» հաղորդմանը հայտարարել է ՀՀ նախկին փոխվարչապետ, Հայաստանի Ամերիկյան համալսարանի բիզնեսի և տնտեսագիտության քոլեջի դեկան Վաչե Գաբրիելյանը:
«Բոլոր այն երկրները, որոնք ուշացրին կանխարգելիչ միջոցառումները, վատ արդյունք ունեցան, և այսօր արդեն խնդրահարույց է, թե դրա հետևանքով մենք ինչպիսի համաճարակային իրավիճակ ունենք. վարակումն այլևս օջախներով չէ, և դժվար է ասել՝ ինչ կտա տնտեսությունը նորից փակելը», ասել է Վաչե Գաբրիելյանը:
Ըստ նախկին փոխվարչապետի՝ եթե անգամ երկիրն անցնի տոտալ կարանտինի, վիրուսն արդեն դուրս է վերահսկողությունից, և եթե ամբողջական փակում ունենանք, որևէ օջախի սահմանափակում չենք ունենալու:
«Դրա փոխարեն պետք է շատ ավելի խիստ ընթացիկ վերահսկողություն իրականացնել: Ավելի ճիշտ է տոտալ վերահսկողության սահմանումը փողոցներում, ավտոբուսներում, խանութներում՝ շատ խիստ տուգանքներ նշանակելով: Պետությունը պետք է հարկադրանքի միջոցների դիմի՝ չբացառելով համոզելը»,- նշել է նա:
Վաչե Գաբրիելյանի խոսքով՝ վարակի դեմ պայքարում կա երկու ծայրահեղ մոտեցում՝ չինական և շվեդական. Չինաստանի մոդելը կոշտ մեկուսացում է ենթադրում, Շվեդիայինը՝ կարանտին չհռչակելը.
«Մենք ոչ Շվեդիա ենք, ոչ Չինաստան, մեր ճանապարհը ոսկե միջինն է, այն պետք է փնտրել և գտնել: Վրաստանը կարանտինին հետևեց շատ ավելի խստորեն, քան մենք, տուգանքները շատ ավելի հետևողականորեն էին կիրառվում, նրանք կարողացան օջախները սահմանափակել: Եթե մարտին բոլոր միջոցառումները ճշգրտորեն և արդյունավետ անեինք, այս վիճակում չէինք լինի»:
Նախկին փոխվարչապետի կարծիքով՝ այսօր հնարավորինս շատ մարդ պետք է աշխատի տնից, եթե կա դրա հնարավորությունը, պետություն էլ պետք է Աշխատանքային օրենսգրքով հատուկ կարգավորումներ տա, օրինակ՝ գործատուներին հորդորի սեփական տրանսպորտային միջոցներն օգտագործել.
«Բնակչության կեսից ավելին չի օգտվել աջակցության որևէ ծրագրից: Պետք էր շատ ավելի լայն շրջանակի ընդգրկել աջակցության ծրագրերում, դա անել ավելի արագ՝ սահմանային դեպքերին մեծ ուշադրություն չդարձնելով: Երկարաժամկետ հեռանկարում այդ օգնությունը պետք է լինի խիստ թիրախային: Եթե կառավարությունը ստիպում է մարդկանց տնից դուրս չգալ, պետք է գումարային խթան առաջարկի»:
Ըստ Վաչե Գաբրիելյանի՝ կառավարությունը մի կողմից պետք է քննարկի հարկային արձակուրդների տարբերակը շահութահարկի գծով, մյուս կողմից՝ մշակի ճյուղային քաղաքականություն, օրինակ, տուրիզմի ոլորտային ներուժը պահպանելու նպատակով: «Մենք դեռևս չենք կորցրել բոլոր շուկաները, բայց աշխատելու ենք շատ ցածր հզորությամբ: Կանխատեսվում է համաշխարհային տնտեսության 10 տոկոսի անկում: 2009-ի 14 տոկոսանոց անկման պատճառը շինարարություն էր, հիմա մենք նման համամասնություններ չունենք: Զրոյական վիճակ, ամեն դեպքում, չենք ունենա»,- ամփոփել է նախկին փոխվարչապետը:
Աշխարհի ամենահայտնի Խորհրդարանական ծեծկռտուքները (ֆոտոշարք)
Գերմանիայում խաղաղ երթերը վերածվել են անկարգությունների, վանդալիզմի և խանութների թալանի
Երեք ծառայողի նկատմամբ կիրառվել է Ծառայության դադարեցում կարգապահական տույժը (տեսանյութ)
Անցում զենքի պարզ մատակարարումից դեպի ավելի խորը ռազմատեխնիկական փոխգործակցություն
Եվրահանձնաժողովն իր աջակցությունն է հայտնել Լեհաստանի վարչապետին
Ռուսական դիզելային վառելիք տեղափոխող երեք լցանավի կարգելվի մուտք գործել Նյու Ջերսիի նավահանգիստ
Էլեկտրաէներգիայի ընդհատումներ կլինեն Երևանի և մարզերի բազմաթիվ հասցեներում
Նեթանյահուն Թրամփին հորդորում է հարվածել Իրանին ԱՄՆ միջանկյալ ընտրություններից անմիջապես հետո
Հանրությանը մոլորեցնելու նպատակ ունեցող ապատեղեկատվություն
Իրանական պատվիրակությունը Դոհայում բանակցություններ է վարել Կատարի միջնորդների հետ