Ոչ մի ներգաղթ էլ տեղի չի ունեցել.

Հիշո՞ւմ եք, թե ինչպես էին նորաթուխ իշխանությունները «հեղափոխությունից» հետո անդադար խոսում ներգաղթի մասին: Հիշո՞ւմ եք, թե ինչպիսի վստահությամբ էին պնդում, որ արտերկրի հայերը տեղափոխվում են Հայաստան: Իհարկե, որոշ ժամանակ անց այդ պնդումները դադարեցին, բայց շատերի մոտ նստվածք մնաց, որ ներգաղթ եղել է:

Օրերս հրապարակվեց, թե այս տարվա առաջին եռամսյակում հայաստանում քանի երեխա է ծնվել, որը մեղմորեն հուշում է, որ ոչ մի ներգաղթ էլ տեղի չի ունեցել: Ընդհակառակը, դեռ մի բան էլ արտագաղթ է եղել:

Այսպես, ըստ պաշտոնական տվյալների, 2020թ. առաջին եռամսյակում ծնվել է ընդամենը 7 հազար 578 երեխա, որոնցից 3038-ը՝ Երևանում, իսկ 4540-ը՝ մարզերում։ 

Համեմատության համար՝ 2019 թ. առաջին եռամսյակում երկրում ծնվածների թիվը կազմել է 7952, իսկ 2018 թ.՝ 8297 երեխա: Ինչպես ասում են, անգամ անզեն աչքով երեւում է, թե որքան է նվազել ծնունդների թիվը:

Այսպիսով, կարելի է ակնկալել, որ այս տարի Հայաստանում կծնվի մոտ 30-31 հազար երեխա, ինչը մտահոգիչ է: Եթե մի պահ հավատանք պաշտոնական վիճակագրությանը, թե Հայաստանում երեք միլիոն մարդ է ապրում, ապա ստացվում է, որ հազար հոգու հաշվով ծնվում է ընդամենը տասը երեխա, ինչը, մեղմ ասած, իրականությանը չի համապատասխանում:

Դիտարկումները ցույց են տալիս, որ Հայաստանում հազար բնակչի հաշվով առնվազն ծնվում է 13-14 երեխա: Իսկ սա նշանակում է, որ Հայաստանում իրականում բնակվում է ոչ թե 3 միլիոն, այլ մոտ 2,1-2,2 միլիոն մարդ:

ի դեպ, 2000-ականների առաջին կեսի համեմատ ծնունդների թիվը պակասել է մոտ 15 հազարով: Սրա մասին եւս պետք է մտածել: Իրական ներգաղթը եղել է հենց այն ժամանակ, երբ Ռոբերտ Քոչարյանի նախագահությամբ Հայաստանը երկնիշ տնտեսական աճ էր արձանագրում: Իսկ ֆեյք ներգաղթ ով ասես կարող է ապահովել: 

Վարդան Մխիթարյան

Top-News.am