Երկրորդ նախագահին կալանքի տակ պահելու հիմնական պատճառը Արցախի հարցն է (տեսանյութ)

Նիկոլ Փաշինյանը Հայաստանում իշխանության է բերվել մեր բոլորի գլխին երկու նպատակով․ կազմաքանդել Ռուսաստանի հետ հարաբերությունները եւ Արցախի հարցում գնալ ոչ հայանպաստ լուծման։ Այս մասին Արմնյուս ՀԸ Անժելա Թովմասյանի «Հայելու առաջ» հեղինակային ծրագրի ընթացքում հայտարարել է «Հայաստան» համահայկական հիմնադրամի նախկին գործադիր տնօրեն, քաղաքագետ Արա Վարդանյանը։

«Ես պնդում եմ, որ Փաշինյանն ու իր ողջ թիմը գնում են հենց այդ ճանապարհով։ Նրանք նաեւ քանդում են Հայաստանը։ Մի կողմից անընդհատ խոսում են ներդրումներից, մյուս կողմից իրենց բոլոր քայլերով բացառում են Հայաստան ներդրումների հոսքը։ Գիտեք՝ գույքի բռնագանձման օրենքը, բանկային գաղտնիքի օրենքը, Ucom-ի սեփականատիրոջ նկատմամբ ինչ որ կատարվում է այս վերջին օրերին, Միքայել Մինասյանի հայտարարությունը։ Այս ամենը փաստում է, որ նրանք գործնական քայլերով բացառում են ներդրումները», ասել է Արա Վարդանյանը։

Արցախի հիմնախնդրի շուրջ մտահոգությունների առումով՝ «Ռեֆորմիստներ» կուսակցության նախագահը նշել է, որ Լավրովի հայտարարությունից հետո, երբ հանրությունը բացատրությունների էր սպասում, նա լռում էր, վերջապես նախօրեին ԱԺ-ում Փաշինյանին հարց տվեցին այդ մասին «եւ նա 10 րոպե խոսեց ոչ մի բանի մասին»։

«Նորից նույն բաները, նույն ձայնասկավառակը, թե պետք է ձեռք տա ոչ միայն մեզ, այլեւ Ադրբեջանին։ Բայց հիշենք՝ ինչ էր ասել Լավրովը, եւ ինչ է պատասխանում Փաշինյանը։ Քեզ հարց են տվել, վեր կաց հայտարարիր՝ բացառվում է, որ մենք կգնանք փուլային տարբերակի, որ հայկական զորքերը կհանենք ազատագրված տարածքներից։ 2018-ին հայտարարում էր 3 միլիոն վարչապետ, միասին ենք լուծելու, բայց հիմա մեզ հետ քննարկում է՞ այդ համահայկական հարցը», նշել է Վահան Բաբայանը։

Արա Վարդանյանն ավելացրել է, որ երբ 1,5 տարի առաջ կալանավորում էին Ռոբերտ Քոչարյանին, ինքը եւ, նրա խոսքով, էլի շատերը, հայտարարում էին, որ երկրորդ նախագահին կալանքի տակ պահելու հիմնական պատճառը Արցախի հարցն է։

«Լավրովի վերջին հայտարարությունը հաստատեց այս միտքը։ Մարդիկ ասում են, թե անձնական վրեժխնդրություն է, ես համամիտ չեմ։ Շատ մարդիկ կան, որ Նիկոլ Փաշինյանի հետ շատ դաժան են վարվել, բայց նա բոլորովին չի հիշում նրանց։ Դա էր նաեւ պատճառը, որ քրեական հետապնդում սկսվեց Սերժ Սարգսյանի հանդեպ։ Նա գիտի, որ նրանք թույլ չէին տա զիջումների գնալ», ասել է Արա Վարդանյանը։

Նրա բառերով՝ այսօր իշխանություն է եկել մարդկանց մի խումբ, որը սրբություն չունի․

«Եկեք համեմատենք, թե վերջին 20 տարվա իշխանությունն ինչով փոխարինվեց․ Ռոբերտ Քոչարյանն ու Սերժ Սարգսյանն իրենց ընտանիքները չհանեցին կրակի տակից, եւ Արցախի պատերազմը տարան մինչեւ վերջ։ Այսօր իշխանության են եկել մարդիկ, որոնք կանանց ու երեխաներին են ուղարկում առաջին գիծ։ Տարբեր տարիների հանրահավաքների, երթերի ժամանակ առաջին շարքերում կանանց ու երեխաներին էին բերում, որպեսզի ցույց ցրելու ժամանակ նրանք տուժեին։ Այսօր իշխանություն է եկել մարդկանց մի խումբ, որը սրբություն չունի, որը թաքնվում է կանանց ու երեխաների թիկունքում», ասել է Արա Վարդանյանը։