«Շնորհակալություն, ցտեսություն»,- ասել է Արթուր Վանեցյանն ու լքել ՀՔԾ-ն

ԱԱԾ նախկին տնօրեն Արթուր Վանեցյանին այսօր՝ մայիսի 7–ին, ՀՔԾ էին հրավիրվել Վատիկանում ՀՀ նախկին դեսպան Միքայել Մինասյանի հայտարարության հետ կապված, ՀՔԾ–ում տեղեկացրել են, որ նյութեր են նախապատրաստվում, և որ իր անունը ևս շրջանառվում է, ու 10 օրվա ընթացքում կտեղեկացնեն` քրեական գործ հարուցելու են թե ոչ: ՀՔԾ հրավիրելու նպատակն ըստ էության դա է եղել: Այս մասին տեղեկացնում է 168.am-ը:

Ըստ կայքի տեղեկությունների` ԱԱԾ նախկին տնօրենը ցուցմունք չի տվել:

«Շնորհակալություն, ցտեսություն»,-ասել է Արթուր Վանեցյանն ու լքել ՀՔԾ-ն:

Ավելի վաղ տեղեկացրել էինք, որ Արթուր Վանեցյանը ՀՔԾ է հրավիրվել Սուրբ Աթոռում նախկին դեսպան Միքայել Մինասյանի հայտարարության հետ կապված։ Այս մասին ֆեյսբուքյան գրառում էր արել Վանեցյանի ներկայացուցիչ Լուսինե Սահակյանը։

Հայտարարության մեջ, մասնավորապես, ասվում է.

«Հայաստանի Հանրապետության Հատուկ քննչական ծառայությունում նյութեր են նախապատրաստվում Միքայել Մինասյանի կողմից վերջերս արված հայտարարության հետ կապված։

Այսօր նյութերի նախապատրաստության շրջանակներում ՀՔԾ է հրավիրված եղել Արթուր Վանեցյանը։ Ընթանում է իրավական գործընթաց, որի վերաբերյալ հավելյալ մեկնաբանություններից զերծ ենք մնում»։

NEWS.am-ի հետ զրույցում Արթուր Վանեցյանի փաստաբան Լուսինե Սահակյանը հաստատեց, որ Վանեցյանը ՀՔԾ–ում շատ կարճ է մնացել և արդեն դուրս է եկել։

Նշենք, որ օրերս Սուրբ Աթոռում նախկին դեսպան Միքայել Մինասյանը հայտարարել էր, որ վարչապետ Նիկոլ Փաշինյանը ԱԱԾ նախկին տնօրեն Արթուր Վանեցյանի միջոցով իրեն գործարք է առաջարկել՝ նրա նկատմամբ քրեական հետապնդումը կդադարեցվի, եթե վերջինը համաձայնի սիմվոլիկ գումար փոխանցել ինչ–որ հիմնադրամի և քաղաքականությամբ չզբաղվել։ Միքայել Մինասյանի խոսքով՝ ինքն այդ գործարքի առաջարկը մերժել է։