Վանաձորի «Գլորիա» կարի ֆաբրիկայի աշխատողները ֆեյսբուքյան գրառմամբ դիմել են վարչապետին

Վանաձորի «Գլորիա» կարի ֆաբրիկայի աշխատողները ֆեյսբուքյան գրառմամբ դիմել են վարչապետին:

Մասնավորապես, ֆեյսբուքյան օգտատեր Էլմիրա Հովսեփյանը, ով Վանաձորի «Գլորիա» կարի ֆաբրիկայի աշխատող է, իր էջում գրում է.

«Պարոն Նիկոլ Փաշինյան հուսով եմ տեղյակ եք ստեղծված իրավիճակից։

Արդեն 20 օր է, ինչ ֆաբրիկան դադարեցրել է աշխատանքը եւ շուրջ 2.500 աշխատակից (ընտանիք) կանգնած է օրվա հացը վաստակելու խնդրի առջեւ, երկար տարիներ աշխատելով տվյալ գործատուի մոտ եւ վճարելով ամսեկան միլիոնների հարկեր , չմոռանանք նաեւ հեղափոխության օրերին մեծ դեր ունենալով հեղափոխությունն իրականանալու գործում մենք բոլորս մեկ մարդու նման եղանք ձեր եւ ձեր ղեկավարած իշխանության կողքին եւ այսօր էլ դեռ շարունակում ենք սատարել ձեզ։ Սակայն այսօր մենք եւ մեր գործատուն կանգնած ենք այս լուրջ խնդրի առջեւ։

Ես ինձ իրավունք եմ վերապահում աշխատակիցների անունից հանդես գալ եւ դիմել ձեզ։ Խնդրում ենք շտապ լուծել այս խնդիրը, եւ կորոնավիրուսի տնտեսական հետեւանքների չեզոքացմանն ուղղված ծրագրի որեւէ կետով բյուջեից հատկացնել գումար:

Հիշեցնենք՝ ավելի վաղ «Ազատության» ռադիոկայանին տված հարցազրույցում «Գլորիա» կարի ֆաբրիկայի սեփականատեր Բագրատ Դարբինյանն ասել էր, որ մտադիր է եւս 1 ամիս փակ պահել ձեռնարկության դռները, անգամ եթե կառավարությունն ապրիլի 20-ից հետո թույլատրի վերագործարկել հագուստի արտադրությունը։

Կորոնավիրուսի տարածման պատճառով գրեթե մեկ ամիս 2600 աշխատակիցներին հարկադիր պարապուրդի ուղարկած սեփականատեր Բագրատ Դարբինյանն ասել է՝ միեւնույնն է, բազմաթիվ սահմանափակումների պայմաններում անհնար կլինի ֆաբրիկայի աշխատանքը։