Ի՞նչ եւ ո՞ւմ հանձնարարությունն է կատարում Ստյոպա Սաֆարյանը

Եթե Ստյոպա Սաֆարյանը չլիներ Հանրային խորհրդի նախագահ, ապա նրա հրապարակային հայտարարություններին, ֆեյսբուքյան գրառումներին լուրջ չէինք վերաբերվի եւ չէինք էլ անդրադառնա: Հիմա ստիպված ենք անդրադառնալ:

Սկանդալային հայտարարություններով եւ գրառումներով հայտնի Ստյոպա Սաֆարյանը հիմա էլ թիրախավորել է Ամենայն Հայոց Կաթողիկոսին: Նա իր ֆեյսբուքյան էջում գրել է. «Կցանկանայի ասել, ավելի լավ է մոմ վաճառիր, հոգ տար եկեղեցու բիզնեսների մասին եւ մի խառնվիր պետության գործերին: Գուցե մի օր մեզ արժանի կաթողիկոս լինի»:

Այս հայտարարությունից անցել են ժամեր, անցել է ավելի քան մեկ օր, բայց նա շարունակում է զբաղեցնել Հանրային խորհրդի նախագահի պաշտոնը: Իսկ եթե նա մնում է իր պաշտոնին, ապա ստացվում է, որ նրա գրառման հետ համաձայն են նաեւ կառավարող ուժի առաջնորդները: Ի վերջո այնտեղից անգամ թեթեւ դիտողություն չհնչեց Ստյոպա Սաֆարյանի հասցեին, որ ի պաշտոնե իրավունք չուներ նման սադրիչ հայտարարություն աներ:

Ստյոպա Սաֆարյանը ոչինչ հենց այնպես չի անում: Կարելի է ենթադրել, որ նա ինչ որ մեկի կամ ինչ որ խմբի հանձնարարությունն է կատարում: Եւ եթե ուշադրություն դարձնենք, թե վերջին օրերին ովքեր են թիրախավորել Հայ Առաքելական Եկեղեցին եւ նրա առաջնորդներին, ամեն ինչ շատ ավելի պարզ կդառնա:

Կաթողիկոսի հասցեին անպատասխանատու հայտարարությունները պետական պաշտոնյաների կողմից ձեռք են բերում ծերուnախտային բնույթ: Եթե հիշենք նաեւ Ալեն Սիմոնյանի հայտարարությունը, եթե դրան ավելացնենք մյուսների գրառումները, ապա ավելի ու ավելի կհասկանանք, որ եկեղեցու դեմ հարձակումը համակարգված բնույթ է կրում եւ ինքնաբուխ չէ:

Ավելին, կարող ենք ենթադրել, որ իշխանափոխությունից հետո եկեղեցու դեմ իրականացվող կեղտոտ գործողությունների հետեւում կանգնած են հենց նրանք, ովքեր այսօր բացահայտ հակաեկեղեցական գրառումներ են անում:

Գործող իշխանություններին հաճախ են համեմատում անցած դարի բոլշեւիկների հետ, նրանց արած քայլերի հետ: Հիմա եւս ակամա համեմատում ես իմքայլականներին եւ բոլշեւիկներին: Պարզապես կա մի մեծ տարբերություն՝ նրանց ուժն անհամեմատ ավելի մեծ էր եւ նրանց ավերածությունների մասշտաբներն անհամեմատ մեծ էին:

Վարդան Մխիթարյան

Top-News.am