Վրաստանում արտակարգ դրությունը կերկարաձգվի մինչև մայիսի 10-ը. փակ կլինեն 4 խոշորագույն քաղաքները. Новости-Грузия

 Վրաստանի կառավարությունը որոշում է կայացրել մինչև մայիսի 10-ը երկարաձգել արտակարգ դրության ռեժիմը: Բացի այդ, ապրիլի 15-ից տաս օրով կարգելվի մուտքն ու ելքը 4 խոշոր քաղաքներից՝ Թբիլիսիից, Ռուսթավից, Բաթումից և Քութայիսից:

Ինչպես հաղորդում է Новости-Грузия-ն, այս մասին ճեպազրույցի ժամանակ հայտարարել է վրաց վարչապետ Գիորգի Գախարիան:

«Ցավոք, կարող ենք արձանագրել այն փաստը, որ առաջին անգամ մեկ օրում կորոնավիրուսով վարակման 30 նոր դեպք է գրանցվել մեզ մոտ: Կարելի է ասել, որ երկրում սկսվել է լիամասշտաբ ներքին տարածման փուլը»,- ասել է Գախարիան՝ ընդգծելով, որ այսօր հնարավոր չէ հստակ կանխատեսել, թե երբ առավելագույն մակարդակին կհասնի վիրուսի տարածումը:

Գախարայի խոսքով՝ առաջին հերթին, կառավարությունը որոշում է կայացրել ապրիլի 15-ի ժամը 21:00-ից արգելել մարդկանց մուտքն ու ելքը վերոնշյալ քաղաքներում: Բացի այդ, Վրաստանի կառավարությունը դիմել է երկրի նախագահին արտակարգ դրությունը մինչև մայիսի 10-ը երկարաձգելու համար: