Մոռացված հանրաքվե

Կառավարող ուժի ներկայացուցիչներն այս օրերին չեն սիրում խոսել չկայացած հանրաքվեի մասին: Խոսքն այն հանրաքվեի մասին է, որը նշանակվեց օրենքի բազմաթիվ եւ ամենակոպիտ խախտումներով: Համավարակը թույլ չտվեց այն անցկացնել ապրիլի 5-ին: Արտակարգ դրության պայմաններում հանրաքվե չի կարող անցկացվել:

Մենք, մինչ արտակարգ դրության սահմանումը փոքր հարցախույզ անցկացրինք մոտ երկու շաբաթվա ընթացքում, որի ընթացքում պարզվեց, որ հանրաքվեին մասնակցելու մտադրություն ունեն Հայաստանի առկա բնակչության 49 տոկոսը: 

Ընդգծենք, որ խոսքը ոչ թե ընտրացուցակներում ընդգրկվածների, այլ Հայաստանում բնակվողների մասին է: 

2018 թվականի Ազգային ժողովի ընտրությունների ժամանակ քվեարկելու իրավունք ունեցողների վերջնական ցուցակում ընդգրկված է եղել 2 մլն 573 հազար 779 մարդ, թե նրանցից քանի տոկոսն է այժմ բնակվում Հայաստանում մի փոքր վիճելի հարց է:

ՀՀ վիճակագրական կոմիտեի տվյալներով՝ մշտական բնակչության թվաքանակը 2 մլն 965.1 հազար է: Ակնհայտ է, որ այս դեպքում ընտրական ցուցակում չի կարող ընդգրկված լինել 2.6 մլն մարդ, բայց ընդգրկված է:

Իսկ իրականում որքա՞ն ընտրող կա Հայաստանում: Որոշ մասնագետներ պնդում են, որ ընտրողների թիվը հազիվ մեկ միլիոն չորս հարյուր հազար է: Այլ գնահատականների համաձայն, ընտրողների թիվը տատանվում է 1.8-2.0 միլիոնի սահմաններում:

Վերցնենք այս գնահատականների միջինը եւ ընդունենք, որ իրական ընտրողների թիվը 1.8 միլիոն է: Եւ այսպես, ստացվում է, որ լավագույն դեպքում ընտրատեղամասեր կարող էր գնալ ընդամենը 800-900 հազար մարդ:

Իսկ թե նրանցից քանի տոկոսը Այո կասեր առաջադրված հարցին, արդեն իսկ այլ հարց է, բայց պարզ է, որ Հայաստանում մեծ թիվ էին կազմում ինչպես հանրաքվեն բոյկոտողներն, այնպես էլ ակտիվ ՈՉ-ի կողմնակիցները: 

Պարզ է, որ ապրիլի 5-ին կառավարող ուժն առանց կոպիտ միջամտությունների եւ ընտրակեղծարարությունների 650 հազարի մասին անգամ չէր կարող երազել:

Հիմա մնում է, որ կառավարող ուժի մոտ հաղթի սթափ բանականությունը եւ նրանք հրաժարվեն այս հանրաքվեի գաղափարից, հատկապես, որ ըստ օրենքի հանրաքվեն կարող է անցկացվել ամռան կեսերին, իսկ այդ ժամանակ, պարզ է, որ ընտրատեղամաս գնացողների թիվը հաստատ անհամեմատ ավելի նվազ կլինի:

Հակոբ Ասատրյան

Top-News.am