Արդեն զգացվում են ճգնաժամային կառավարման հարցում իշխանության ունակությունների բացակայության հետեւանքները. Վանեցյան

Վերջին օրերին Հայաստանում կորոնավիրուսի տարածման անհանգստացնող ցուցանիշը զգոնություն է պահանջում բոլորիցս: Այս մասին Instagram-ի իր էջում գրել է ԱԱԾ նախկին տնօրեն Արթուր Վանեցյանը:

Նա, մասնավորապես, նշել է. «Էժան դիվիդենտներ ստանալու փորձերը կամ իրավիճակն անհարկի անլրջացնելն ու պատասխատվություն ստանձնելու անկարողությունը հավասարապես վտանգավոր են:

Արդեն իսկ պարզ է, որ համավարակը բերելու է սոցիալ-տնտեսական եւ բարոյահոգեբանական խնդիրներ: Այս բարդ իրավիճակում, երբ վտանգված է ազգաբնակչության առողջապահական, տնտեսական, ֆինանսական, կենցաղային անվտանգությունը, անհրաժեշտ է համախմբվել, չմատնվել խուճապի եւ բոլոր գործողությունները համադրել պատկան կառույցների որոշումների եւ հորդորների հետ:

Միեւնույն ժամանակ, այս օրերի իրադարձությունները ցայտուն կերպով բացահայտեցին այն իրողությունը, որ կառավարման ոլորտում չհամակարգված գործողությունները, ռիսկի պատշաճ գնահատման ունակության բացակայությունը եւ հախուռն որոշումները հանգեցնում են ազգային անվտանգությանը սպառնացող խնդիրների:

Ցավոք, արդեն իսկ զգացվում են ճգնաժամային կառավարման հարցում իշխանության բարձրագույն օղակներում համապատասխան ունակությունների եւ փորձի բացակայության բացասական հետեւանքները: Այս պայմաններում, երբ բնակչության եւ պետության անվտանգության խնդիրներն առաջնային են, կոչ եմ անում համախմբվել պետության շուրջ, իսկ իշխանություններին հորդորում եմ ի վերջո լրջանալ եւ աշխատանքային պարտականություններին վերաբերվել պատշաճ պատասխանատվությամբ:

Առողջություն բոլորիս ընտանիքներին:

Այս թեմայով Հետևում եմ Գյումրիում ՔՊ–ի ջղաձգումներին, ընդդիմության հաղթանակն անխուսափելի է․ Արթուր Վանեցյան Բանակում կորուստների թեման բոլորիցս պահանջում է լինել զուսպ և խնդրին մոտենալ մեծ պատասխանատվությամբ. Արթուր Վանեցյան Եթե Սուրեն Պապիկյանը ասելիք ունի, թող ուղիղ ասի և կստանա իր պատասխանը․ Արթուր Վանեցյան