«Էրդողանն իրեն երկրորդ Աթաթուրք է երևակայում». Մահչուփյան

 Թուրքիայի նախկին վարչապետ և արտգործնախարար Ահմեդ Դավութօղլուի նորաստեղծ «Ապագա» կուսակցության նախագահի գլխավոր օգնական, հայազգի Էթյեն Մահչուփյանը հայտարարել է, որ նախագահ Ռեջեփ Թայիփ Էրդողանն իրեն «երկրորդ Աթաթուրք» է երևակայում ու կարծում է, որ ինքը մեծ առաջնորդ է:

Ինչպես նշում է diken.com.tr կայքը, իր խոսքում հայազգի քաղաքական գործիչը անդրադարձել է Թուրքիայի ներկայիս քաղաքական իրավիճակին՝ հստակ շեշտադրումներով քննադատելով Թուրքիայի իշխանություններին:

Մահչուփյանը մասնավորապես նշել է, որ այսօրվա Թուրքիայի իշխանությունները ամենակոռումպացվածն են հանրապետության պատմության մեջ և իրենց նպատակներին հասնելու համար օգտագործում են գյուլենականների ստեղծած մեթոդները:

«2015 թվականի ընտրություններին «Արդարություն և զարգացում» կուսակցության հաջողությունը երկրորդ շանս էր Էրդողանի համար, որպեսզի անի իր ծրագրածը: Դրանից հետո նա ինքն իրեն սկսեց վարպետ անվանել՝ իրեն երկրորդ Աթաթուրք երևակայելով: Բայց եթե աշակերտությունից դեպի վարպետություն անցնելու ճանապարհին չես ապավինում իրական գիտելիքներին, ապա մեծագույն սխալներ ես թույլ տալիս: Չեմ կարծում, որ Թայիփ Էրդողանը գիտակցաբար վատ բաներ է արել երկրի համար: Նա անում է այնքան, որքան գիտի »-ասել է Մահչուփյանը:

Իր խոսքում հայազգի քաղաքական գործիչը չի բացառել նաև, որ Գեզիի այգում տեղի ունեցած դեպքերը, հեղաշրջման փորձը կազմակերպված լինեն հենց իշխանությունների կողմից:

Հիշեցնենք, որ Գեզի պուրակի ծառահատումների և, փոխարենը, առևտրի կենտրոն կառուցելու որոշման դեմ բողոքի ակցիան 2013թ.-ի ամռանը վերաճել էր հակակառավարական ցույցերի։