«Վստրեչի Ապերի» եղբորորդին եւ հարեւանն ազատ են արձակվել

«Վստրեչի Ապեր» մականունով հայտնի Արամ Վարդանյանի եղբորորդին՝ Արման Վարդանյանն ու հարեւանությամբ բնակվող անձը երեկ ուշ երեկոյան ազատ են արձակվել։

NEWS.am–ի տեղեկություններով, առաջին ատյանի դատարանը մերժել է նախաքննական մարմնի միջնորդությունը՝ նրանց նկատմամբ որպես խափանման միջոց կալանքն ընտրելու վերաբերյալ։

Մեկնաբանություն ստանալու համար դիմեցինք Արման Վարդանյանի պաշտպան Լուսինե Սահակյանին։

«Ինչպես գիտեք՝ դատարանները նույնիսկ այն դեպքերում երբ տեսնում են, որ հիմնավոր կասկածը բացակայում է, հիմնականում կարող են մերժել կալանքի միջնորդությունը հիմքերի բացակայության պատճառաբանությամբ կամ գրավ կիրառել, կամ առհասարակ աշխատում են հիմնավոր կասկածի հետ կապված հարցին շատ չանդրադառնալ։ Բացառիկ դեպքերում, երբ այնքան ակնհայտ է հիմնավոր կասկածի բացակայությունը եւ ոչինչ գրել չեն կարող, դատարանը միջնորդությունը մերժում է հիմնավոր կասկածի բացակայության հիմքով։ Արամ Վարդանյանի եղբորորդու եւ հարեւանությամբ բնակվող անձի դեպքում դատարանները մերժել են կալանքի միջնորդությունը հիմնավոր կասկածի բացակայությամբ»,– ասաց պաշտպանը։

Նշենք, որ Արամ Վարդանյանի եղբորորդուն մեղադրանք է առաջադրվել առեւանգման համար, իսկ մյուս անձին՝ կողոպուտի:

Հիշեցնենք, որ 2020թ. մարտի 4-ի գիշերը՝ ժամը 02.40-ի սահմաններում, ոստիկանության հարյուրավոր աշխատակիցներ ներխուժել են Արամ Վարդանյանին եւ նրա հարազատներին պատկանող Արցախի փողոցի 17 հասցեում գտնվող տներ։

Կատարված գործողությունների արդյունքում բերման էին ենթարկել Արամ Վարդանյանի որդուն եւ 2 քաղաքացու, 2 քաղաքացի էլ ձերբակալվել է, որից մեկը Վարդանյանի եղբորորդին է, մյուսը՝ հարեւանը:

Նշենք, որ տան խուզարկությունը շարունակվում էր նաեւ երեկ։ Վարդանյանի փաստաբաններ Երվանդ Վարոսյանին եւ Լուսինե Սահակյանին քննիչները ներկայացրել էին տանը խուզարկությունն իրականացնելու դատարանի որոշումը։ Ըստ որոշման բովանդակության՝ նրանք Վարդանյանի տանը փնտրում էին զենք-զինամթերք, չգտնելով նմանատիպ իրեր, վերցրել են Վարդանյանի անձնական կյանքին վերաբերող տեսաերիզներ։

Լուրեր Հայաստանից - NEWS.am