Մեր նկատմամբ հրահրվող սադրանքները միտված էին իրավիճակն Արցախում ներսից պայթեցնելուն. Արթուր Դանիելյան (տեսանյութ)

Երբ մենք տեղափոխվեցինք Արցախի Ռև գյուղ, այդ գյուղում հայտնվեցին մարդիկ, որոնք ցանկանում էին, ենթադրում եմ, որ հանձնարարական էին ստացել, ամեն կերպ մեզ խոչընդոտել: Այս մասին ֆեյսբուքի իր էջում ուղիղ եթերի ընթացքում ասաց Ադեկվատ միաբանության ղեկավար Արթուր Դանիելյանը:

Նրա խոսքով, խոչընդոտելու ալիքը շատ արագ մարեց և մարդիկ շատ արագ հասկացան, որ Ադեկվատ միաբանության այնտեղ գտնվելը ժամանակավոր չէ և մեր դեմ պայքարելու համար բավականին ռեսուրս կպահանջվի:

«Այդ ալիքը մարեց ու սկսվեց այլ ալիք. ոմանց թվաց, որ մենք այնտեղ ենք ներքաղաքական պրոցեսներում խառնվելու համար և մեզ չեզոքացնելու համար սկսեցին միջոցներ ձեռնարկել: Այնուհետև մեզ չեզոքացնելու մարտավարությունը փոխվեց և փորձ էր արվում մեզ տեղեկատվական կամ քաղաքական պայքարում որպես սադրանքի միջոց օգտագործել: Այդ սադրանքները միտված էին պայթեցնելու իրավիճակը ներսից Արցախում, քանի որ Հայաստանում մենք շատ ռադիկալ կեցվածք ունենք և այդ առումով շատ հարմար թիրախ ենք»,- ասաց Դանիելյանը:

Նրա խոսքով, իրենց սադրելով ինչ-որ կոնֆլիկտի, Նիկոլ Փաշինյանին հնարավորություն կտրվեր ևս մեկ անգամ Բակո Սահակյանին և Արցախի իշխանություններին և պետականությանը հարվածել: Դանիելյանն ասաց, որ սա հասկանալով, իրենք իրենց միշտ զսպել են:

«Ամեն ինչ սկսվեց նրանից, որ մեզ ասացին, որ մենք գնացել ենք Ռև գյուղ, որ տեղացիներին վնաս տանք: Այդ տեղեկությունը սկսեցին տարածել գյուղացիների մեջ, իսկ ճնշող մեծամասնությունն անտարբեր գտնվեց. բայց գտնվեցին մարդիկ որոնք այդ մանիպուլյացիաներին կուլ գնացին: Երբ հասկացան, որ մենք այդ մանիպուլյացիաներին չենք աձագանքելու և կոնֆլիկտի չենք գնալու, սկսեցին ավելի ստոր քայլերի դիմել, օրինակ՝ գյուղացիներին ասելով, որ ես ստորացրել եմ Մոնթե Մելքոնյանին: Անկախ ամեն ինչից, ես ասացի որ չեմ կռվելու»,- ասաց Արթուր Դանիելյանը:

Մանրամասները՝ տեսանյութում