Ինչպես խաբել մարդկանց եւ նրանց տանել քվեարկության

Սահմանադրական դատարանի անդամներից ազատվելու համար հանրաքվե հորինած կառավարող ուժն իր իսկ որոշման ձեռքը կրակն է ընկել: Ինչպե՞ս մարդկանց համոզել եւ տանել տեղամասեր քվեարկության, ինչպե՞ս ապահովել անհրաժեշտ 650 հազար ԱՅՈ-ն:

Կառավարող ուժը, վարչապետի գրասենյակը հույսը դրել է հանրության առավել անգրագետ խմբի վրա, առանց հաշվի առնելու, որ նրանք, այնուամենայնիվ շատ քիչ են: Գուցե հույս են դրել նաեւ Մուկուչյանի աճպարարության վրա, իհարկե, չի բացառվում:

Այսուհանդերձ, երբ երկրի վարչապետը ֆեյսբուքյան էջում գրում է, թե ապրիլի 5-ին Հեղափոխությանը ասում ենք Այո, Ազատությանը ասում ենք Այո, Ապագային ասում ենք Այո եւ կոռուպցիոներների վրա շրխկացնում ենք դուռը, հասկանալի է դառնում, որ կառավարող ուժի միակ հույսը մարդկանց զգացմունքների հետ խաղալն ու նրանց խաբելով դեպի տեղամասեր տանելն է:

Ի՞նչ կապ ունի հանրաքվեում դրված հարցը ազատության կամ ապագայի, առավել եւս օրինակ Վերմիշյանի կամ Աջափնյակի թաղապետի հետ:

Փաշինյանն էլ շատ լավ գիտի, որ ոչ մի կապ չունի, բայց ինչպես մարդկանց համոզի, որ գնան քվեարկության եւ Այո ասեն, երբ բացարձակ անտարբեր են խնդրի նկատմամբ: Ի վերջո ՀՀ քաղաքացին լավ հասկանում է, որ Հրայթ Թովմասյանը որեւէ կապ չունի ոչ ձախողված տնտեսական հեղափոխության, ոչ ձախողված ժողովրդավարության, ոչ էլ ձախողված արտաքին քաղաքականության հետ:

Կառավարող ուժն աննախանձելի վիճակում է: Մի կողմից ապօրինի նշանակված հանրաքվեն, մյուս կողմից ժողովրդի ճնշող մեծամասնության անտարբերությունը: Եւ այս մասին շատ լավ վկայում է Փաշինյանի մեկ այլ ֆեյսբուքյան գրառումն ու տեղադրած ակնհայտ մանիպուլիացիոն լուսանկարը. 

«Չկա ավելի զորեղ բան, քան ժողովրդական, «ինքնագործ» քարոզչությունը»:

Ի՞նչ կապ ունի ճանապարհների նորոգումը հանրաքվեի դրված հարցի հետ: Բնականաբար՝ ոչ մի: Եւ եթե Հրայր Թովմասյանն է խանգարում, որ ասֆալտ անեք, ապա իչնպես հաջողացրիք նորոգել մի շարք ճանապարհներ: Մյուս կողմից բացի Կարեն Կարապետյանի կառավարության որոշումն իրականություն դարձնելով եւ մի քանի կիլոմետր ասֆալտ անելուց բացի ոչինչ չունեք արած, որ գոնե դրանով մանիպուլիացիաներ անեք: Տխուր է այս ամենը, շատ տխուր: 

Վարդան Մխիթարյան

Top-News.am