Հանրաքվեի հետևանքները հաղթահարելու համար անհրաժեշտ կլինեն տասնամյակներ, քանի որ խաթարվում է սահմանադրական կայունությունը

Սահմանադրական փոփոխությունների հանրաքվե անցկացնելու դեպքում՝ առաջանալու են իրավական այնպիսի հետևանքներ, որոնք հաղթահարելու համար, ցավոք սրտի, անհրաժեշտ կլինեն նույնիսկ տասնամյակներ: Այս մասին «Սահմանադրական անվտանգություն․ մարտահրավերներ և լուծումներ» խորագրով քննարկմանն ասաց Սահմանադրական դատարանի նախագահի խորհրդական Գրիգոր Մուրադյանը:

«Իրավագիտությունը, վերջնականապես, տապալված է մեր երկրում: Իրավագիտության մասին այլևս որևէ խոսք չի կարող լինել, քանի դեռ այս գործընթացներում տեղի չունենա շրջադարձ և մենք, առանց չափազանցության, վերահաստատենք Սահմանադրական կարգը մեր պետությունում և իրավական պետության գոնե տարրական իրավաընկալումը»,- ասաց նա:

Գրիգոր Մուրադյանի կարծիքով՝ Սահմանադրական փոփոխությունների հարցով հանրաքվե իրականացնելու պատճառն այն է, որ ժամանակակից Սահմանադրական պետությունն իր արժեհամակարգով և ինստիտուտներով անհամատեղելի է ծայրահեղական պոպուլիզմի հետ:

«Շատերը ՍԴ-ի դեմ իրականացվող բիրտ ոտնձգությունները կապում են կոնկրետ գործերի հետ, ինչ-ինչ խնդիրների հետ: Իհարկե, դրանք նույնպես կարող են արդարացված լինել, բայց իրականում ծայրահեղական պոպուլիզմը և Սահմանադրական պետությունն անհամատեղելի են: Քաղաքացիական համերաշխությունը, սոցիալական արդարությունը, լիբերալիզմը, որոնք դրված են ժամանակակից սահմանադրությունների հիմքում, անհամատեղելի են ծայրահեղական պոպուլիզմի հետ: ՍԴ-ն՝ որպես Սահմանադրության բարձրագույն պահապան, պետք է սահմանադրական արժեհամակարգը պահպանի ցանկացած ոտնձգությունից»,- նշեց ՍԴ նախագահի խորհրդականը:

Ըստ Մուրադյանի՝ ծայրահեղական պոպուլիզմի հիմքում դրված է քաղաքական սեգրեգացիան՝ պառակտումը, բաժանումը, տարբեր մասերի. «Չկա կոռումպացված ռեժիմ, չկա թշնամի, բայց, անպայման, պետք է այդ թշնամին լինի, հակառակ դեպքում ծայրահեղական պոպուլիզմի գոյատևման շանսերը հավասարվում են զրոյի»:

Ինչ վերաբերում է Սահմանադրական փոփոխությունների հեղինակների հիմնավորումներին՝ Գրիգոր Մուրադյանի նշեց, որ հնարավոր չէ դադարեցնել անփոփոխելի դատավորի լիազորությունները, եթե նա հրաժարական չի տալիս կամ եթե նրա հանդեպ քրեական վարույթի շրջանակում չի իրականացվում մեղադրական դատավճիռ:

«Սահմանադրության 7-րդ գլխի հիմնական հեղինակը ես եմ: 7-րդ գլուխը շարադրելիս՝ իմ մտքով անգամ չի անցել, որ այն հնարավոր է մեկնաբանել այնպես, որ իրավական պետությունում ՍԴ ցանկացած դատավորի անփոփոխելիությունը կարող է չլինել երաշխավորված, քանի որ այդպես է կարծում, իրենց ընկալմամբ, ժողովուրդը: Երբ մենք փոխում ենք Սահմանադրության անցումային դրույթները և վտանգում ենք դատավորների անփոփոխելիությունը, դրանով կասկածի տակ է դրվում իրավական պետության գոյությունը: Այլ խոսքով, տապալում ենք իրավական պետությունը: Հայաստանը դադարել է լինել իրավական պետություն, քանի որ իրավական պետության կրող հիմքերից մեկը դատավորների անկախությունը, անփոփոխելիությունը և պաշտոնավարման անվտանգությունն է»,- ասաց նա:

Գրիգոր Մուրադյանի խոսքով՝ խաթարվում է սահմանադրության կայունությունը, քանի որ ըստ սահմանադրական փոփոխությունների՝ ՍԴ 7 դատավորի լիազորություններ դադարեցվելու են, որոշակի ժամանակ Հայաստանում չի գործելու Սահմանադրական դատարանը:

«Պնդումներ են արվում, որ սահմանադրի՝ ժողովրդի կամքը կեղծվել է, բայց այդ «կեղծված» կամքի մեջ հիմա փոփոխություններ են կատարվում: Այսինքն, եթե կամքը կեղծվել է, ապա պետք է ընդունվեր նոր Սահմանադրություն, նոր մոտեցումներով, չի կարելի «կեղծված» Սահմանադրության մեջ կատարել այնպիսի անհեթեթ փոփոխություններ, որոնք համատեղի չեն այդ սահմանադրության հետ»,- նշեց ՍԴ նախագահի խորհրդականը: