Ասեք, թե ովքեր են այդ հանրույթի մարդիկ, որ ցանկանում են փոփոխել Սահմանադրությունը, անգամ եթե նրանք ձեր քարանձավից են. (տեսանյութ)

Այսօր՝ Ազգային ժողովում Սահմանադրական փոփոխությունների նախագծի քննարկմանը, «Լուսավոր Հայաստան» խմբակցության պատգամավոր Անի Սամսոնյանը զեկուցող Վահագն Հովակիմյանից հետաքրքրվեց, թե երբ ասվում է իրավական հանրությում գնալով թեժանում են քննարկումները՝ ՍԴ դատավորների կարգավիճակի ակնհայտ տարբերությունների վերաբերյալ, որ հանրույթին նկատի ունեն:

Վահագն Հովակիմյանը նշեց, որ իրավական հանրույթի՝ մեր ու Ձեր տեսադաշտի տիրույթը տարբեր է: «Հաստատ կարող եմ վստահեցնել, որ իրավական հանրույթի այն շրջանակը, որն ինձ է ծանոթ՝ նման խնդիր քննարկում են: Ես չեմ բացառում, որ Ձեր շփման տեսադաշտի իրավական հանրույթն այլ բան է կարծում: Կախված թե Ձեր քարանձավից ոնց եք տեսնում աշխարհը, ամեն մարդ իր քարանձավից յուրովի է տեսնում՝ ես էլ իմ. փոխաբերական ընկալեք ասածս»,-ասաց նա:

Անի Սամսոնյանը շարունակելով նշեց. «Սա այն հարց չէ, թե մենք հարցնենք, թե ով է ուզում փոխել ՍԴ և Դուք ասեք ժողովուրդը՝ չիմանալով, թե այդ ժողովուրդը Վահագն Հովակիմյանն է, թե՝ Պողոս Պողոսյանը: Հակառակ դեպքում այս հիմնավորման մեջ նշված իրավական հանրույթը միայն Ձեր քարանձավի մարդիկ են, որոնք բերել են հակասահմանադրական նախագիծ և պարտադրում են ընդունել՝ ոչ միայն ԱԺ-ին, այլ ժողովրդին: Ասեք, ովքեր են այդ հանրույթի մարդիկ, եթե անգամ նրանք Ձեր քարանձավի մարդիկ են»:

Վահագն Հովակիմյանը նշեց, որ եթե հիմա սկսի թվարկել, կարող է ընթացքում մոռացության մատնել և դրանով վիրավորել որոշ մարդկանց, ապա հավելեց, որ հետագայում, երբ համոզվի ցանկն ամբողջական է, կտրամադրի: