Վերաքննիչ դատարանը բավարարեց դատախազության միջնորդությունը Ռոբերտ Քոչարյանի գործով

Վերաքննիչ քրեական դատարանը` դատավոր Արմեն Դանիելյանի նախագահությամբ, բավարարեց դատախազության բողոքը ՀՀ երկրորդ նախագահ Ռոբերտ Քոչարյանի գործով:

Որոշումը հրապարակվել է փետրվարի 6-ի առավոտյան: Այն կարող է բողոքարկվել 15-օրյա ժամկետում: Այսպիսով, Վերաքննիչ դատարանը չեղարկեց առաջին ատյանի դատարանի որոշումը: Փաստաբաններին մերժել են 2008 թվականի մարտի 1-ի գործով նյութերի ամբողջական ծավալով տրամադրման հարցում: Տեղի ունեցավ նաև փոքրիկ շփոթություն. դատավորը որոշումը հրապարակ էր հետին տարեթվով՝ նշելով 2019 թվականի փետրվարի 6-ը: Երբ նրան ասացին այդ մասին, դատավորը բանավոր կերպով ուղղեց սխալը:

Ինչպես հաղորդվել էր ավելի վաղ, դատախազությունը վերաքննիչ բողոք էր ներկայացրել առաջին ատյանի դատարանի՝ 2008 թվականի մարտի 1-ի դեպքերի վերաբերյալ գործի նյութերի` պաշտպանությանը տրամադրելու որոշման կապակցությամբ: Դատախազությունը կարծում է, որ նյութերի հրապարակումը կամ անգամ փաստաբանների ծանոթությունը դրանց կարող է վնաս հասցնել այլոց շահերին:

Ռոբերտ Քոչարյանի փաստաբանները պնդում են, որ նախկին նախագահի և մյուսների դեմ գործի` առանձին վարույթների մեջ առնված մասի նյութերն ընտրվել են կամայականորեն՝ բացառապես նպատակ ունենալով հաստատել մեղադրանքը: Փաստաբանները կարծում են, որ գործում կարող են լինել նյութեր, որոնք բխում են իրենց պաշտպանյալի շահերից, նյութերին ծանոթանալը կարող է իրականացվել չհրապարակման մասին ստորագրությամբ, իսկ եթե փաստաբանները գտնեն, որ դրանք անհրաժեշտ է քննել դատարանում, ապա` դռնփակ նիստի պայմաններում: Մեղադրող կողմի փաստարկներին առ այն, որ օրենքն արգելում է քննության փուլում գտնվող գործի նյութերի հրապարակումը, փաստաբանները հակադարձում են նրանով, որ իրենք խնդրում են նյութերն այն հատվածից, որի քննությունն արդեն ավարտվել է:

Լուրեր Հայաստանից - NEWS.am