«Սթորմիի աշխարհ». Քայլի Ջեները գերշքեղ միջոցառում է կազմակերպել դստեր երկրորդ տարեդարձի առիթով (լուսանկարներ)

Աշխարհի ամենաերիտասարդ միլիարդատիրուհի Քայլի Ջեները դստեր` Սթորմիի ծննդյան երկրորդ տարեդարձի առթիվ շքեղ թեմատիկ «կառնավալ» է կազմակերպել: Այս մասին տեղեկանում ենք Instagram սոցիալական կայքում աստղի էջում արված հրապարակումներից:

Միջոցառման հիմնական խորագիրը «Սթորմիի աշխարհ. 2-ն ավելի լավ է, քան 1-ը» արտահայտությունն է եղել: 22-ամյա աստղը մանրակրկտորեն ծրագրել է ամեն դետալ` փոքրիկի տոնը լիակատար և անմոռանալի դարձնելու համար:

Միջոցառման սրահն ամբողջովին զարդարված է եղել Սթորմիի անիմացիոն պատկերներով, մասնակիցներից շատերը «Սթորմիի աշխարհ» թեմատիկ գրությամբ հագուստներով են ներկայացել:

Փոքրիկի օրը տոն են դարձրել հրավիրված անիմացիոն կերպարները, մուլտֆիլմի հերոսները, երեխաներն ուրախացել են սրահի ներսում տեղակայված ատրակցիոններով, զանազան խաղերով:

Երկամյա փոքրիկի «դեմքն» ամենուր է եղել. անգամ սրահի մուտքը ձևավորված է եղել աղջնակի «հսկա դեմքով»:

Սրահում Սթորմի անունով մանկական հագուստի և աքսեսուարների խանութ է գործել:

Հրավիրված հյուրերի թվում են եղել ամերիկյան Keeping Up With the Kardashians իրապատում շոուի ամերիկահայ աստղ Քիմ Քարդաշյանը, նրա ընտանիքի անդամները, Քայլի Ջեների ընկերները, երգիչ Ջոն Լեջենդը` ընտանիքի հետ, այլք: