Նիկոլ Փաշինյանի ծանր հրետանին՝ Դանիել Իոնիսյան

Հասկանալու համար, թե ինչ վիճակում, ինչ բարոյահոգեբանական աստիճանի վրա է գտնվում կառավարությունն ու վարչապետի գրասենյակը, պետք է միայն հետեւել, թե ում վրա են հույս դրել իրենց ծրագրերն իրականություն դարձնելու համար: Անկեղծ լինենք, այն քաղաքական ուժը, այն կառավարությունը, որը հույսը դրել է Դանիել Իոնիսյանի կամ Ստյոպա Սաֆարյանի աջակցության վրա դատապարտված է ձախողման եւ տապալման:

Սահմանադրական դատարանի շուրջ առաջացած իրավիճակի վերաբերյալ ԵԽԽՎ հայաստանյան հարցերով համազեկուցողների վերջին հայտարարությունից հետո կառավարությունը պետք է որ կանգ առներ, դադար վերցներ, փորձեր կողքից նայել իրավիճակին եւ համապատասխան հետեւություններ անել, բայց առաջնագիծ են նետել Դանիել Իոնիսյանին՝ իրենց դնելով ավելի խայտառակ վիճակի մեջ:

Դանիել Իոնիսյանը, որի արած ամենակարեւոր գործը դպրոցի տնօրեններին թաքուն ձայնագրելն էր եւ այն հրապարակելը, այսօր կառավարության աջ ձեռքն է: Իոնիսյանը, որի անցյալը հիմա մենք չենք քննարկի, այժմ կառավարության աջակցությունն ունենալով դիտորդ է Արցախում, սահմանադրագետ է եւ պատրաստվում է մեզ համար Սահմանադրություն գրել, ինչպես նաեւ մատ է թափ տալիս ՍԴ անդամների վրա: Ռուսները կասեն՝ докатились:

Դիմելով ՍԴ անդամներին Իոնիսյանն ասում է. «Հույս ունեմ, որ ՍԴ անդամները կսեղմեն իրենց մեկնված ձեռքը, лучше по доброму»:

Եւ նրա այս հայտարարությունը լսելուց հետո հարց է առաջանում՝ թե չէ ի՞նչ: Իսկապես այս ուր գլորվեց ու ընկավ Փաշինյանի կառավարությունը:  

Ինչո՞վ է զբաղված հիմա Իոնիսյանը: Պարզապես նա հայաստանցիներին, ամբողջ աշխարհին, այդ թվում եւ ԵԽԽՎ հայաստանյան հարցով համազեկուցողներին ավելի ու ավելի է համոզում, որ Վենետիկի հանձնաժողովի եզրակացության ու ԵԽԽՎ հայտարարության մեջ ընդգծված դատավորների վաղ կենսաթոշակի կամավորության սկզբունքը հեքիաթ է, եւ որ այդ օրենք կոչվածը գրվել է միայն ու միայն ՍԴ-ն կառավարության դուստր ձեռնարկություն դարձնելու համար:

Մենք ականատես եղանք, թե ինչպես է Իոնիսյանը սպառնում ՍԴ անդամենրին: Այն Իոնիսյանը, որը վարչապետի եւ նրա գրասենյակի սիրելին է: Մնացած բոլոր խոսակցությունները եւ քննարկումներն արդեն ավելորդ են:

Դուք պարտվել եք, այն էլ ծանր պարտություն եք կրել: Որքան էլ վիճակագրական թիվ հրապարակեք դրանից իրականությունը չեք փոխի: Միայն դաժան պարտություն կրած կառավարությունը մարտի կնետւի Իոնիսյանին եւ Սաֆարյանին:

Վահրամ Գեւորգյան

Top-News.am