Ռուստամ Բադասյանի կինը, աշխատելով Լենա Նազարյանի մոտ որպես փորձագետ, միաժամանակ զբաղեցրել է ղեկավար պաշտոն առևտրային ընկերությունում. Նարեկ Մալյան (տեսանյութ)

Արդարադատության նախարար Ռուստամ Բադասյանի համար ունեմ շատ վատ նորություններ: Այս մասին ֆեյսբուքյան էջի ուղիղ եթերում հայտարարեց «ՎԵՏՕ» շարժման ղեկավար Նարեկ Մալյանը՝ տեղեկացնելով, որ արդարադատության նախարարի տիկինը առանց մրցույթի որոշակի ժամանակ աշխատել է Լենա նազարյանի աշխատակազմում:

«Պարզվել է, որ ՀՀ արդարադատության նախարար Ռուստամ Բադասյան հետ փոխկապակցված անձը` կինը, Տաթևիկ Սարգսյանը, հանրային պաշտոնում նշանակվելուց հետո այլ անձի հետ համատեղ հիմնադրել է առևտրային ընկերություն և հիմնադրման պահից մինչ օրս, բացի բաժնետեր լինելուց, ղեկավարել է այդ ընկերությունը: Պարզվել է՝ Տաթևիկ Սարգսյանը, աշխատելով ՀՀ ԱԺ աշխատակազմում որպես Լենա Նազարյանի փորձագետ, միաժամանակ զբաղեցրել է ղեկավար պաշտոն առևտրային ընկերությունում և ստացել վարձատրություն այդ ընկերությունից»,-ասաց նա:

Ըստ Նարեկ Մալյան՝ բացառվում է, որ նրանք չիմանային, որ չի կարելի միաժամանակ երկու տեղից աշխատավարձ ստանալ: «Այստեղ երկրորդ հարցն է առաջանում, որ մի տեղ Ռուստամ Բադասյանի կինը ֆիկտիվ աշխատանք է իրականացրել և պետք է հասկանանք, թե որտեղ է ֆիկտիվ աշխատել: Ես ունեմ ենթադրությունների համար հենարան, որ արդարադատության նախարարի տիկինը լուրջ չի վերաբերվել ԱԺ–ում իր աշխատանքին»,-ասաց նա:

Նարեկ Մալյանը հայտնեց նաև, թե պարզվել է, որ Տաթևիկ Սարգսյանը ԱԺ աշխատակազմում Լենա Նազարյանի գրասենյակում փորձագետ է նշանակվել առանց մրցույթի: «Սա դասական խնամի-ծանոթ-բարեկամն է»,- ասաց նա և նշեց, որ պատրաստվում է իրավապահ մարմիններին դիմումներ ներկայացնել այս ամենի վերաբերյալ: