«Իմ տեղեկություններով Հրայր Թովմասյանին առաջադրվել է մեղադրանք». Ռուբեն Մելիքյան

Ուզում եմ տեղեկություն փոխանցել, չեմ կարող ասել, որ ճշտված է, բայց իմ տեղեկություններով Հրայր Թովմասյանին առաջադրվել է մեղադրանք։ Այս մասին ՍԴ-ում լրագրողների հետ զրույցում նշեց «Իրավական ուղի» ՀԿ-ի ներկայացուցիչ Ռուբեն Մելիքյանը:

«Չեմ կարող ասել, թե ինչ հոդվածով։ Շատ ավելի հստակ է դառնում այս պրոցեսը: ՍԴ նախագահին մեղադրանք առաջադրելը կամավորության մասին այդքան փողահարված օրենքից հետո, եթե որեւէ մեկը կարծում է, թե այս բոլոր գործընթացները մեղադրանք առաջադրելը պատճառական կապի մեջ չեն, դժվար է տրամաբանական համարել այդ մոտեցումը, որ դա գոյության իրավունք ունեցող մոտեցում է»,-ասաց նա:

Ռուբեն Մելիքյանը նկատեց, որ մինչեւ նոր Սահմանադրության ուժի մեջ մտնելը Հրայր Թովմասյանը ընդհանուր անձեռնմխելիությամբ է օժտված եղել. «Արդյոք այն հետադարձ ուժ ունի, թե չունի: Սա հիմա մի կողմ թողնենք եւ խոսենք այն մասին, որ իշխող քաղաքական ուժը, փաստորեն կանգ չառավ այս քայլի առջեւ: Իսկ թե թե ինչ է նշանակում ՀՀ-ում մեղադրանք վերջին շրջանում քաղաքական պատճառներով, մենք բազմաթիվ նման օրինակներ ունենք: Ես կարծում եմ, որ առնվազն լուրջ հիմքեր ունենք լուրջ կասկածամտությամբ վերաբերվելու առաջադրված մեղադրանքին»,-ընդգծեց Մելիքյանը:

Նշենք, որ այս պահին ՍԴ-ում ՀՔԾ ներկայացուցիչները քննում են ՍԴ նախագահ Հրայր Թովմասյանին: ՍԴ-ի բակում ընթանում է նաեւ բողոքի ակցիա։ Այնտեղ են քաղաքական գործիչներ եւ իրավաբաններ։

Հիշեցնենք, որ երեկ՝ դեկտեմբերի 26-ին, ՀՀ նախագահ Արմեն Սարգսյանը ստորագրել է «Սահմանադրական դատարանի մասին» սահմանադրական օրենքում լրացումներ կատարելու մասին, «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում լրացում կատարելու մասին ՀՀ օրենքների փաթեթը՝ ՍԴ դատավորներին վաղ կենսաթոշակի ուղարկելու մասին։ Դրանից անմիջապես հետո ՀՔԾ քննիչները գնացել էին ՍԴ, սակայն պարզ չէ, թե ինչ նպատակով։

Ավելի ուշ տեղեկություն էր ստացվել, որ ՀՔԾ-ն եւս մեկ դրվագով լրացրել է ՍԴ նախագահ Հրայր Թովմասյանի սանիկ Նորայր Փանոսյանին առաջադրված մեղադրանքը եւ այդ հիմնավորմամբ կրկին դիմել դատարան՝ Փանոսյանին կրկին կալանավորելու համար։