Ավստրիայում կտուգանեն հանրային վայրերում հիջաբ կրելու համար
Ավստրիայի խորհրդարանը կողմ է արտահայտվել հանրային վայրերում մարմինն ամբողջությամբ ծածկող հագուստի՝ փարանջայի, հիջաբի եւ այլնի կրումն արգելող օրենքին: Հոկտեմբերից սկսած՝ Ավստրիայի ամբողջ տարածքում դրա համար 150 եվրո տուգանք կգանձվի: Այս միջոցն այսպես կոչված ինտեգրացիոն փաթեթի մաս է, որով նաեւ արգելվում է Ղուրանի օրինակների անվճար բաժանումը, հաղորդում է DW-ն:
Բացի այդ՝ նախաձեռնության շրջանակում միգրանտներն ու փախստականները մեկ տարվա ընթացքում կհաճախեն ինտեգրման դասընթացների, որի ընթացքում կուսուցանվի գերմաներեն եւ ավստրիական արժեքներ: Արտաքին գործերի եւ ինտեգրման նախարար Սեբաստիան Կուրցի խոսքով՝ միգրանտներն այսպես կկարողանան արժանանալ ավստրիական հանրության հարգանքին:
Ինտեգրացիոն փաթեթն Ավստրիայի կառավարությանը տարեկան մոտ 200 մլն եվրո կարժենա: