«Սենատի որոշումը պատմական է բոլոր նրանց համար, ովքեր պայքարում են ճշմարտության համար». թուրք ցեղասպանագետ

Թուրք հայտնի պատմաբան և ցեղասպանագետ Թաներ Աքչամն անդրադարձել է ԱՄՆ Սենատի կողմից Հայոց ցեղասպանությունը ճանաչող բանաձևի ընդունմանը և իր Facebook-ի էջում կիսվել այդ նորությամբ:

«ԱՄՆ Ներկայացուցիչների պալատից հետո, Սենատը նույնպես ընդունեց Հայոց ցեղասպանությունը ճանաչող բանաձևը: Սա պատմական որոշում և պատմական օր է ոչ միայն հայերի, այլ նաև Թուրքիայի ժողովրդի և բոլոր նրանց համար, ովքեր պայքարում են ճշմարտության և արդարության համար»,- գրել է նա:

«Գրվում է, որ որոշումը պետք է հաստատման ուղարկվի և նմանատիպ այլ բաներ: Բայց այս որոշումը հաստատման ենթակա որոշում չէ: ԱՄՆ-ի ղեկավար 3 մարմիններից երկուսը՝ Ներկայացուցիչների պալատն ու Սենատը, արդեն ճանաչել են ցեղասպանությունը, և եթե նույնիսկ Թրամփը մեկ անգամ չարտաբերի «ցեղասպանություն» բառը, միևնույն է, իրավական տեսանկյունից կարող ենք ասել, որ ԱՄՆ-ն ճանաչել է Հայոց ցեղասպանությունը: ԱՄՆ-ի կողմից ցեղասպանության ճանաչումը տարբերվում է այլ երկրների ճանաչումից: Սպասելի կլինի, որ ԱՄՆ դատարաններում իրար հետևից դատական գործեր կսկսվեն, որոնք գլխացավանք կդառնան Թուրքիայի համար: Տեսնենք, թե ինչպես կարձագանքի Թուրքիան»,- գրել է նա:

Հիշեցնենք, որ երեկ՝ դեկտեմբերի 12-ին, ԱՄՆ Կոնգրեսի վերին պալատը՝ Սենատը, միաձայն ընդունել է Հայոց ցեղասպանությունը ճանաչող բանաձևը՝ մերժելով Թուրքիայի քաղաքականությունը: Բանաձևը պաշտոնապես մերժում է Թուրքիայի՝ հայերի, հույների, սիրիացիների, ասորիների և այլ քրիստոնյա ազգերի դեմ կատարած ցեղասպանության հարցում ժխտողականությունը:

Հիշեցնենք նաև, որ Ներկայացուցիչների պալատը հոկտեմբերի վերջին ընդունել էր Ցեղասպանությունը ճանաչող բանաձևը 405 կողմ, 11 դեմ ձայների հարաբերակցությամբ: