Վտանգավոր և տագնապալի իրադարձություններ են մեզ սպասվում, լրջագույն փորձությունների միջով ենք անցնելու

«Մեկ Հայաստան» կուսակցության նախագահ Արթուր Ղազինյանը ֆեյսբուքյան իր էջում գրում է.

««Ռուսաստանն ունի բոլոր լծակները Արցախում պատերազմ թույլ չտալու համար»
Նիկոլ Փաշինյան, 26 հուլիսի 2018թ.:

«Նախկին իշխանությունները դավադիր պատերազմ հրահրելու, անգամ որոշ տարածքներ հանձնելու եւ տեղի ունեցածի պատասխանատվությունը Հայաստանի կառավարության վրա դնելու հեռահար նպատակ են հետապնդում»:

Նիկոլ Փաշինյան, 20 մայիսի, 2019թ.:

Այս երկու հայտարարությունները խորքային վերլուծելու արդյունքում կարելի է հասկանալ, թե Հայաստանի նոր իշխանությունների կողմից ովքեր են մեղավոր և պատասխանատու կարգվելու Արցախում պատերազմի վերսկսման դեպքում հնարավոր տարածքային և մարդկային կորուստների համար:

Չենք մոռանում Նիկոլ Փաշինյանի 2016թ.-ի ապրիլյան պատերազմի առնչությամբ հայտնած դիրքորոշումներն ու գնահատականները:

Ասվածի համատեքստում հարկ եմ համարում արձանագրել, որ Հայաստանի և Արցախի անվտանգության հետ կապված բոլոր զարգացումների և դրանց հետևանքների համար ամբողջ պատասխանատվությունը կրելու են ՀՀ նոր իշխանությունները և անձամբ Նիկոլ Փաշինյանը:

Հ.Գ. Վտանգավոր և տագնապալի իրադարձություններ են մեզ սպասում, լրջագույն փորձությունների միջով ենք անցնելու, որից մենք ազգովի պետք է դուրս գանք մաքրված և առավել ուժեղացած:

Այլընտրանքը պետության և պետականության կործանումն է:

Աստված մեզ պահապան . .»։