Գործարարները չեն նվիրել «ԿամԱԶ»-ներ, նրանք անհայտ հաշվեհամարի գումար են փոխանցել, որով էլ գնվել են դրանք. բանավեճ

Վերջին շրջանում Երևանի քաղաքապետարանի շուրջ ստեղծված աղմուկի վերաբերյալ բանավիճել են Երևանի ավագանու «Լույս» խմբակցության ղեկավար Դավիթ Խաժակյանը, ԱԺ «Իմ քայլը» խմբակցության պատգամավոր Անուշ Բեղլոյանը, Երևանի ավագանու ԲՀԿ խմբակցության ղեկավար Միքայել Մանրիկյանը և Երևանի ավագանու «Իմ քայլը» խմբակցության քարտուղար Հասմիկ Խաչունցը:

«Չգիտես ինչու իմ գործընկերները կարծում են, որ քաղաքապետը պետք է ընդուներ իրենց բանավեճի հրավերները: Ես կարծում եմ, որ սա շատ սխալ պրոտոկոլային խախտում կլիներ, եթե քաղաքապետը ընդուներ նրանց հրավերները: Քաղաքապետի կաբինետի դուռն այնքան բաց է, որ թե՛ գործընկերներս, թե՛ մենք, թե՛ ընդդիմադիրները կարող են ցանկացած պահի մոտենալ, նաև անձամբ զանգել քաղաքապետին և տալ բոլոր հարցերը»,- այս մասին հայտարարեց Խաչունցը՝ անդրադառնալով դիտարկումներին, թե քաղաքապետ Հայկ Մարությանը հրաժարվել է ընդունել թե՛ Դավիթ Խաժակյանի, թե՛ Միքայել Մանրիկյանի բանավեճի հրավերը:

ԲՀԿ-ական Միքայել Մանրիկյանը նշեց, որ հարց ունի Խաչունցին և հետաքրքրվեց՝ արդյոք ավագանու «Իմ քայլը» խմբակցության անդամները տեղյա՞կ են եղել վերջին շրջանում աղմուկ հանած «ԿամԱԶ»-ների նվիրատվությունից: «Դուք կամ ձեր խմբակցությունը տեղյակ եղե՞լ է, որ տարբեր կազմակերպությունների կողմից քաղաքապետարանը ստանալու է «ԿամԱԶ» մակնիշի ավտոմեքենաներ»,- ասաց նա:

Վերոնշյալին ի պատասխան Խաչունցն արձագանքեց. «Հարգելի՛ պարոն Մանրիկյան, դրանք պայմանագրային պայմանավորվածություններ և աշխատանքային գործընթացներ են և դրա մասին որևէ մեկը պարտավոր չէ իմանալ: Դրանք քաղաքապետարանի գործառույթներն են, որոնց եթե հետաքրքրվեինք, կիմանայինք, եթե չէինք հետաքրքրվի, չէինք իմանա»:

Խաչունցի պատասխանին արձագանքեց Դավիթ Խաժակյանը. «Ով գիտի՝ էլ ինչեր են արել, որ չեք հետաքրքրվել ու չգիտեք»:

Մանրիկյանը խնդրեց հստակ պատասխանել՝ տեղեկացված եղե՞լ են, թե՝ ոչ և, ստանալով բացասական պատասխան, ասաց. «Ես ցավում եմ ձեզ համար»:

Դավիթ Խաժակյանն անդրադարձավ գործարար Սամվել Ալեքսանյանի անվան հետ կապված «Ալեքս ընդ հոլդինգ» ընկերությանը և նշեց, որ այն որոշումը, որը տրվել է Սամվել Ալեքսանյանին պատկանող կազմակերպության շենքի օրինականացմանը, տրվել է 1 ամիս 8 օր ժամկետում, որը իսկապես, համեմատած մյուսների, արտոնյալ է: «Փաստերն ակնհայտ են և չեն կարող չհիշեցնել «Երևան» հիմնադրամի կոռուպցիոն փորձը»,- ասաց նա:

Հասմիկ Խաչունցն էլ հակադարձեց, որ «Երևան» հիմնադրամի գործը հիմա գտնվում է իրավական դաշտում: «Այդ հիմնադրամ մուտք գործող դրամների հետ կապված խնդիր չի եղել, դրանք թափանցիկ էին՝ չնայած նրան, որ ստիպողաբար էին փոխանցվում գումարները: Այդտեղ կասկածները կայանում էին նրանում, թե էդ փողերն ո՞ւր են ծախսվել, իսկ այս դեպքում մենք հստակ ունենք գույք, որն աշխատում է քաղաքում, կարծում եմ, այդ երկուսը տարբեր օպերաներից են»,- պարզաբանեց նա:

Խաչունցին հակադարձեց Մանրիկյանը՝ նշելով, որ իրենց ասածն այն է, որ արդեն իսկ կոռուպցիան է, երբ կա նախնական պայմանավորվածություն:

«Ներքին պայմանավորվածությունների մասին. դրանք եղել ենք, թե ոչ, մենք ոչինչ չենք կարող ասել, ինչպես չենք կարող ասել, թե ինչ է խոսվել քաղաքապետի սենյակում «շեյխերի» հետ: Ես որպես օրինակ եմ բերում»,- ասաց Խաչունցը:

Պատգամավոր Անուշ Բեղլոյանն էլ արձագանքեց Դավիթ Խաժակյանին: «Մեկ տարվա մեջ պարոն Խաժակյանը Հայկ Մարությանին երևի միայն աչքերի գույնի համար չի մեղադրել: Եթե մենք հետևենք մեկ տարվա ընթացքում քանի անգամ է պարոն Խաժակյանը բարձր հայտարարություններ արել տարբեր չարաշահումների մասին, անօրինականությունների մեջ մեղադրել Հայկ Մարությանին, տպավորություն կստեղծվի, որ Տարոն Մարգարյանը՝ ձևափոխված Հայկ Մարությանի անվամբ, եկել է»,- նշեց նա:

Պատգամավորը նշեց, որ Խաժակյանը որդեգրել է ապակառուցողական, զրպարտության վրա հիմնված տակտիկա, որով փորձում է մարդկանց ուղեղների մեջ ներմուծել՝ կոռուպցիա-Հայկ Մարության կապը: «Դուք անարդյունավետ քաղաքական գործիչ եք, որովհետև մեկ տարվա ընթացքում ձեր հայտարարությունների ՕԳԳ-ն հավասար է 0-ի է»,- նշեց Բեղլոյանը:

Դավիթ Խաժակյանն էլ հիշեցրեց ամիսներ առաջ քաղաքապետարանի կողմից անցկացված մի քանի միլիոն դրամի մրցույթը, որը վերաբերում էր աղբատար մեքենաների ձեռքբերմանը, և որն իրականացվել էր օրենքի խախտումներով. ««Լույս» խմբակցությունն այդ մասին բարձրաձայնեց և գնումների բողոքարկման խորհուրդը, որը պետական կառույց էր, ճանաչեց այդ գնումը օրենքին հակասող: Ես դիմեցի քաղաքապետին, որ շտկվեն գնման պայմանագրերը, այլ բան է, որ դա չիրականացվեց»,- ասաց Խաժակյանը և շարունակեց, որ իր նշած դեպքում պնդում է, որ գործարարները փոխանցել են գումար անհայտ հաշվեհամարի, որից հետո տեղի է ունեցել այդ գնումը:

«Մենք հիմա փորձում ենք պարզել, թե ինչ հաշվեհամարի են գումարները փոխանցվել, և առաջիկայում ապացուցելու ենք, որ գործարարները իրենք չեն գնել «ԿամԱԶ»-ներ, իրենք տվել են փողը որևէ կառույցի, որի արդյունքում տեղի է ունեցել գնումը»,- շեշտեց Խաժակյանը:

Բեղլոյանն էլ ասաց, որ Խաժակյանը քաղաքապետին մեղադրեց կաշառք վերցնելու մեջ: Վերջինս էլ նշեց, որ ինքը Մարությանին չի մեղադրել կաշառք վերցնելու մեջ և նկատեց, որ հանցագործության մասին հաղորդում է ներկայացրել: