Թուրքիայի 11 նահանգում միաժամանակ վերսկսվել է Գյուլենի աջակիցների «որսը»
Թուրքիայի 11 նահանգում միաժամանակ վերսկսվել են 2016թ.-ի հուլիսի 15-ի ռազմական հեղաշրջման փորձի կազմակերպիչը համարվող թուրք կրոնական քարոզիչ Ֆեթուլլահ Գյուլենի ենթադրյալ թիմակիցների դեմ ոստիկանական հատուկ գործողությունները, այս մասին հայտնում է թուրքական «Սաբահ» պարբերականը:
Հայտնի է, որ արդեն կա 16 ձերբակալված, ևս 22 կասկածյալ գտնվում է հետախուզման մեջ:
Թուրքիայի հետախուզական կոմիտեն պնդում է, որ կասկածյալներն օգտվել են ByLock կոդավորված հավելվածից: Հետախուզությունը համոզված է, որ ByLock-ից Թուրքիայի տարածքում օգտվում են հեղաշրջման փորձի համար մեղադրվող Ֆեթուլլահ Գյուլենի աջակիցները։
Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: