Sunday Times-ը հայտնել է Բրիտանիայի ամենահարուստ բնակիչների անունները

Բրիտանիայի ամենահարուստ բնակիչների ամենամյա վարկանիշային աղյուսակը գլխավորել են Շրի եւ Հոփի Հինդուջա եղբայրները, որը կիրակի հրապարակել է Sunday Times պարբերականը: Հինդուջա եղբայրները, որոնք ծագումով Հնդկաստանից են, վերահսկում են ֆինանսաարդյունաբերական խոշոր Hinduja Group խումբը: Ցուցակում են ընդգրկվել նախկին ուկրաինացի, ամերիկացի միլիարդատեր Լեոնարդ Բլավատնիկը, երգչուհի Ադելը եւ «Հարրի Փոթերի» հեղինակ Ջոան Ռոուլինգը, փոխանցում է BBC-ի ռուսական ծառայությունը:

Ըստ Sunday Times-ի՝ 2017 թվականին Բրիտանիայում աճել է ինչպես մեծահարուստների թիվը, այնպես էլ նրանց կարողությունը: Այս տարի բրիտանացի մեծահարուստների ընդհանուր կարողությունը աճել է 14 տոկոսով, 575 միլիարդ ֆունտից 658: Անցյալ տարվա համեմատությամբ՝ Բրիտանիայում 14-ով աճել է նաեւ միլիարդատերերի թիվը:

Մեծացել է նաեւ ցուցակում ընդգրկվելու շեմը՝ 2017 թվականին Sunday Times-ի վարկանիշի գոնե առաջին հազարյակում ընդգրկվելու համար պետք էր նվազագույնը 110 մլն ֆունտ ունենալ:

Մեկնաբաններն ակնկալում էին, որ 2017 թվականին մեծահարուստների թիվը բացասական դինամիկա կունենա՝ կապված ԵՄ-ից Բրիտանիայի դուրս գալու հետ, բայց նման բան չի եղել: Ցուցակում ընդգրկված գրեթե յուրաքանչյուր բիզնեսմենի կարողությունը անցյալ տարի աճել է:

Հարկ է նշել, որ ցուցակի մեջ են մտել ոչ միայն բրիտանացիները, այլեւ այլ երկրների քաղաքացիները, որոնք Միացյալ Թագավորությունում սեփականություն ունեն: Այսպես՝ 5-րդ հորիզանականում է ռուս եւ Շվեյցարիայի հարկային ռեզիդենտ Ալիշեր Ուսմանովը՝ մոտ 11,8 մլրդ ֆունտ կարողությամբ, իսկ 13-րդ՝ ֆուտբոլային «Չելսի» ակումբի սեփականատեր Ռոման Աբրամովիչը (մոտ 8 մլրդ):

Ցուցակի առաջին տասնյակում ծագումով Բրիտանիայից միակ մեծահարուստը Վեսթմինսթերի դուքս Հյու Ռիչարդ Լուի Գրոսվենորն է, որի ընտանիքը Լոնդոնում եւ Բրիտանիայի այլ շրջաններում մեծ թվով անշարժ գույքի սեփականատեր է: Գրոսվենորի կարողությունը 9,5 մլրդ ֆունտ է գնահատվում, որը համապատասխանում է վարկանիշի 9-րդ տեղին:

news.am