Ֆրանսիան արգելել է անազատության մեջ պահել դելֆիններին
Ֆրանսիայի իշխանությունները պաշտոնապես արգելել են դելֆիններին եւ կետադելֆիններին անազատության մեջ պահել, տվյալ հրամանը արձակել է շրջակա միջավայրի պաշտպանության նախարար Սեգոլեն Ռուայալը։
Ինչպես հաղորդում է BBC-ն, ըստ օրենքի նաեւ արգելվել է դելֆինների եւ հասարակության անմիջական շփումը դելֆինարիումներում։ Բացի այդ, լողավազաններում, որտեղ պահվում են դելֆինները այժմ արգելվում է քլորացված ջրի օգտագործումը։
Նշվում է, որ Ռուայալը առաջնորդվել է այն տվյալներով, որ անազատության մեջ պահվող դելֆիններին սեդատիվ նյութեր են տալիս։
Դելֆինարիումների տերերը դժգոհ են նախարարի որոշումից, եւ հայտարարում են, որ իրենց հաստատությունները այսպիսով կարող են վերանալ։ Մասնավորապես, նրանք նշում են, որ ըստ նոր կանոնակարգի, իրենք ստիպված են լինելու մեծացնել իրենց լողավազանների տարածքը մոտ երկու անգամ։
Բնապահպանները, իրենց հերթին, ողջունել են նախարարի որոշումը, ասելով, որ դա Ֆրանսիայի համար «պատմական առաջընթաց է»։
Top-News.am