Charlie Hebdo–ն պատկերել է Լե Պենին եւ Մաքրոնին շների տեսքով
Ֆրանսիական սկանդալային երգիծական Charlie Hebdo շաբաթաթերթը իր էջում հրապարակել է երկրի նախագահի թեկնածուներ Մարին Լե Պենի եւ Էմանուել Մաքրոնի ծաղրանկարները՝ շների տեսքով։ Նկարը հայտնվել է «Օրվա նկար» բաժնում։
«Հառաջ» շարժման առաջնորդը պատկերված է պուդելի կերպարով, որն ասում է «Մարի՛ն, տե՛ղդ»։ Նրա հետեւից վազում է փոքրիկ ֆրանսիական բուլդոգը՝ «Ազգային ճակատի» նախկին առաջնորդի դեմքով՝ ասելով «Հա՞ֆ»։ Նկարը վերնագրված է՝ «Մաքրոնը Ելիսեյան պալատում»։
Այս թեմայով սա շաբաթաթերթի առաջին նկարը չէ։ Ապրիլի 25-ին Charlie Hebdo-ն ծաղրանկար էր հրապարակել Մաքրոնի եւ նրա կնոջ՝ Բրիջիտի վերաբերյալ, որտեղ Բրիջիտն ամուսնուն ասում էր. «Հագիր քո անջրաթափանց բաճկոնը, փիսիկս»։
Հիշեցնենք, որ Ֆրանսիայում նախագահական ընտրությունների երկրորդ փուլը տեղի կունենա մայիսի 7-ին։ Առաջին փուլի արդյունքներով՝ պայքարը շարունակում են Էմանուէլ Մաքրոնը՝ ձայների 24,1 տոկոսով եւ Մարին Լե Պենը՝ ում իրենց ձայնն են տվել ընտրողների 21,3 տոկոսը։